برطانیہ کی ایک سابق ویٹرنری نرس کا کہنا ہے کہ ان کے پالتو کتے نے کینسر کی ابتدائی مرحلے میں نشاندہی کر کے ان کی زندگی بچا لی۔
یہ بھی پڑھیں: بلیاں کینسر کے علاج کے لیے اہم سراغ فراہم کریں گی
بی بی سی کے مطابق انگلیڈ کی کاؤنٹی کینٹ کے علاقے ہیڈکورن میں رہائش پذیر70 سالہ کولین فرگوسن کو پہلی بار اس وقت شبہ ہوا کہ کچھ گڑبڑ ہے جب ان کا انکا نامی مادہ جرمن شیفرڈ بار بار ان کی سانس سونگھنے کی کوشش کرنے لگی۔
انکا کے اس غیر معمولی رویے نے فرگوسن کو طبی معائنہ کرانے پر مجبور کیا جس کے نتیجے میں پھیپھڑوں کے پہلے مرحلے کے کینسر کی تشخیص ہوئی۔
کولین فرگوسن نے بتایا کہ سنہ 2015 میں جب انکا 2 سال کی تھی ایک دن اچانک بار بار ان کے منہ کے قریب آ کر سونگھنے لگی اور پریشان دکھائی دینے لگی۔
انہوں نے کہا کہ میں اسے دور ہٹانے کی کوشش کرتی رہی مگر وہ باز نہ آئی۔ ایک دن میں دوپہر کی نیند سے اٹھی تو دیکھا کہ وہ میرا چہرہ ایک ملی میٹر کے فاصلے سے دیکھ رہی تھی۔ انہوں نے کہا کہ اسی لمحے میں نے اپنے شوہر سے کہا کہ میں طبی ٹیسٹ کرواؤں گی۔
ابتدائی خون کے ٹیسٹ نارمل آئے لیکن انہیں اندرونی طور پر محسوس ہوتا رہا کہ انکا کسی بات کی نشاندہی کر رہی ہے چنانچہ انہوں نے نجی طور پر مکمل جسمانی اسکین کروانے کا فیصلہ کیا۔
مزید پڑھیے: ہر سال کینسر کے لاکھوں مریضوں کو بچایا جاسکتا ہے، عالمی رپورٹ
کولین نے کہا کہ مجھے بتایا گیا کہ مجھے پھیپھڑوں کا ابتدائی مرحلے کا کینسر ہے۔ انہوں نے مزید کہا کہ مجھے یقین نہیں آ رہا تھا کیوں کہ معمولی تھکن کے سوا مجھے کوئی علامت نہیں تھی اور میں کبھی سگریٹ نوش بھی نہیں رہی۔
فرگوسن کے مطابق طبی عملے نے بھی انکا کی تعریف کی۔ انہوں نے بتایا کہ ڈاکٹروں نے کہا کہ اتنے ابتدائی مرحلے میں کینسر کا پتا چلنا تقریباً ناممکن ہوتا ہے جب تک کہ آپ کسی اور وجہ سے اسکین نہ کروا رہے ہوں اسی وجہ سے مجھے ریڈیوتھراپی یا کیموتھراپی کی ضرورت پیش نہیں آئی۔
انہوں نے بتایا کہ سرجن نے ان کے بائیں پھیپھڑے سے گولف بال کے برابر سائز کی رسولی نکالی اور کہا کہ اس کتے نے تمہاری جان بچائی ہے، اب جاؤ اور اپنی زندگی جیو۔
کولین فرگوسن بعد ازاں تخلیقی تحریر کی تعلیم حاصل کر کے خود شائع شدہ مصنفہ بن چکی ہیں۔ وہ کہتی ہیں کہ وہ ہر موقعے پر انکا کو بتاتی ہیں کہ وہ کتنی اچھی بچی ہے اور اسے خوب انعام بھی دیتی ہیں۔
مزہد پڑھیں: ’کینسر کی کوئی علامت نہیں تھی‘، تشخیص کیسے ہوئی، بھارتی اداکارہ ماہیما چوہدری نے بتادیا
کولین نے کہا کہ انکا کو بہت سی ٹریٹس ملتی ہیں، یہ تو طے ہے۔
