امریکی ٹیکنالوجی کمپنی میٹا نے اعلان کیا ہے کہ وہ انسٹاگرام کے ڈائریکٹ میسجز سے اینڈ ٹو اینڈ انکرپشن کا فیچر 8 مئی 2026 تک ختم کر دے گی۔
کمپنی کے مطابق یہ فیصلہ اس لیے کیا گیا ہے کیونکہ اس پرائیویسی فیچر کو استعمال کرنے والے صارفین کی تعداد بہت کم تھی۔
یہ بھی پڑھیں: انسٹاگرام کی ڈائریکٹ میسجنگ سسٹم میں بڑی خرابی، ہزاروں صارفین متاثر
یہ فیچر 2021 میں متعارف کرایا گیا تھا اور اس کا مقصد زیادہ نجی اور محفوظ سوشل میڈیا ماحول کو فروغ دینا تھا، تاہم اب اسے بند کرنے کا فیصلہ کیا گیا ہے۔
میٹا نے اپنے بیان میں کہا کہ انسٹاگرام کے ڈائریکٹ میسجز میں اینڈ ٹو اینڈ انکرپٹڈ میسجنگ کو بہت کم لوگ فعال کر رہے تھے، اسی لیے اس آپشن کو ختم کیا جارہا ہے۔
#Meta pulls plug on end-to-end encryption for #Instagram DMshttps://t.co/xvO99ml4lW
— News9 (@News9Tweets) March 14, 2026
کمپنی نے کہا کہ جو صارفین زیادہ محفوظ گفتگو چاہتے ہیں وہ واٹس ایپ استعمال کریں کیونکہ اس ایپ میں اینڈ ٹو اینڈ انکرپشن پہلے سے بطور ڈیفالٹ موجود ہے، اس کے برعکس انسٹاگرام پر اس فیچر کو دستی طور پر فعال کرنا پڑتا تھا۔
مزید پڑھیں: واٹس ایپ میں انسٹاگرام کی طرح ’کلوز فرینڈز‘ فیچر متعارف کرانے کی تیاری
میٹا نے فی الحال انکرپٹڈ میسجنگ کے متبادل کسی نئے فیچر کا اعلان نہیں کیا، تاہم جن صارفین نے انکرپٹڈ پیغامات استعمال کیے ہوئے ہیں انہیں جلد ہدایات فراہم کی جائیں گی تاکہ وہ اس فیچر کے ختم ہونے سے پہلے اپنی میڈیا فائلیں اور پیغامات ڈاؤن لوڈ کر سکیں۔
دوسری جانب گزشتہ ہفتے ٹک ٹاک نے بھی انکرپٹڈ میسجز متعارف نہ کرانے کا فیصلہ کیا تھا، کمپنی کا کہنا تھا کہ انکرپشن کی وجہ سے قانون نافذ کرنے والے اداروں اور سیفٹی ٹیموں کے لیے ضرورت پڑنے پر پیغامات کا جائزہ لینا مشکل ہو سکتا ہے۔
ماہرین نے میٹا کے اس فیصلے پر تشویش کا اظہار کرتے ہوئے کہا ہے کہ اس اقدام سے ان صارفین کے لیے محفوظ رابطے کے اختیارات کم ہو جائیں گے جو نجی اور محفوظ گفتگو کو ترجیح دیتے ہیں۔
