پی ایس ایل ٹرافی مختلف شہروں سے ہوتی ہوئی لاہور پہنچ گئی

ایچ بی ایل پاکستان سپر لیگ (پی ایس ایل) کی خوبصورت انفینیٹی ٹرافی مختلف شہروں کا سفر طے کرنے کے بعد لاہور پہنچ گئی ہے۔

یہ بھی پڑھیں: دنیا کی بہترین کرکٹ لیگز کی نئی رینکنگ جاری، پی ایس ایل کس پوزیشن پر؟

یہ ٹرافی اپنے ملک گیر دورے کے دوران پشاور سے لاہور لائی گئی۔

کراچی سے سفر کا آغاز

انفینیٹی ٹرافی کی رونمائی 11 مارچ کو نیشنل اسٹیڈیم کراچی میں کی گئی تھی۔

مزید پڑھیے: پی ایس ایل ٹرافی جیتنا ہی اہم نہیں، نئے کھلاڑیوں کو موقع فراہم کرنا بھی ضروری ہے، شاہین آفریدی

اس کا باقاعدہ ٹور مزار قائد سے شروع ہوا جس کے بعد اسے شہر کے نمایاں مقامات جیسے ایمپریس مارکیٹ، سی ویو، میری ویدر ٹاور اور لیاری لے جایا گیا۔

حیدرآباد میں نمائش

حیدرآباد میں ٹرافی کو مکلی نیکروپولس، شاہ جہاں مسجد اور حیدرآباد کرکٹ اسٹیڈیم میں پیش کیا گیا جہاں شائقین نے اس کی جھلک دیکھی۔

اسلام آباد اور راولپنڈی کا دورہ

1600  قیمتی پتھروں سے مزین اس ٹرافی نے اسلام آباد میں فیصل مسجد اور یادگارِ پاکستان کا رخ کیا جبکہ راولپنڈی میں اسے پی ایس ایل کی 2 ٹیموں کے مشترکہ ہوم گراؤنڈ میں بھی لے جایا گیا۔

شمالی علاقہ جات کی سیر

اسکردو میں انفینیٹی ٹرافی کو خوبصورت مقامات جیسے کھپلو فورٹ، کٹپانا ڈیزرٹ، گھواری، کیرس سسپنشن برج اور اپر کچورا جھیل پر بھی پیش کیا گیا، جہاں اس کی دلکش تصاویر سامنے آئیں۔

پشاور سے لاہور تک

پشاور میں ٹرافی کو تاریخی سیٹھی ہاؤس اور عمران خان کرکٹ اسٹیڈیم لے جایا گیا۔ اب یہ لاہور پہنچ چکی ہے، جبکہ ٹورنامنٹ کے دوران اسے دیگر شہروں، خصوصاً ملتان اور کوئٹہ میں بھی لے جایا جائے گا۔