صدر آصف علی زرداری نے عالمی گلیشیئرز ڈے کے موقع پر اپنے پیغام میں کہا ہے کہ گلیشیئرز زندگی کا بنیادی سہارا ہیں اور پاکستان میں موجود 13 ہزار سے زائد گلیشیئرز دریائے سندھ کا اہم ذریعہ ہیں۔
صدر مملکت نے کہا کہ گلیشیئرز زراعت، توانائی اور پانی کی فراہمی میں کلیدی کردار ادا کرتے ہیں، تاہم ماحولیاتی تبدیلی کے باعث ان کے پگھلاؤ میں تیزی آئی ہے، جس سے برفانی جھیلوں کے پھٹنے اور سیلاب کے خطرات بڑھ گئے ہیں۔ 2025 کے موسمی واقعات خطرے کی گھنٹی ہیں اور شمالی علاقوں کو شدید موسمی خطرات کا سامنا ہے۔
مزید پڑھیں: تیزی سے پگھلتے گلیشیئرز گلگت بلتستان کو کس طرح نقصان پہنچا رہے ہیں؟
انہوں نے موسمیاتی نگرانی اور انتباہی نظام کو مزید مضبوط بنانے کے عزم کا اظہار کیا اور کہا کہ نیشنل کلائمٹ پالیسی اور ایڈاپٹیشن پلان پر عمل جاری ہے۔ صدر زرداری نے پہاڑی ممالک کے درمیان تعاون کی اہمیت پر بھی زور دیا اور کہا کہ گلیشیئرز کا تحفظ آنے والی نسلوں کے آبی مستقبل کے لیے ناگزیر ہے۔
