پی ایس ایل 11 کی رنگا رنگ تقریب، ٹرافی اور ترانے کی رونمائی، محسن نقوی کا اہم بیان

لاہور میں پاکستان کرکٹ بورڈ کے چیئرمین محسن نقوی کی جانب سے پی ایس ایل 11 کی ٹیموں اور ملکی و غیر ملکی کھلاڑیوں کے اعزاز میں ایک پروقار تقریب کا انعقاد کیا گیا، جس میں اہم شخصیات اور کرکٹرز نے شرکت کی۔

چیئرمین پی سی بی محسن نقوی نے تقریب میں شریک ملکی و غیر ملکی کھلاڑیوں اور معزز مہمانوں کا استقبال کیا۔

تقریب کے دوران پی ایس ایل 11 کی ٹرافی کی رونمائی کی گئی، جبکہ ایونٹ کا آفیشل ترانہ بھی لانچ کیا گیا۔

قومی مفاد میں لیگ محدود کرنے کا فیصلہ

محسن نقوی نے کہا کہ خطے کی موجودہ صورتحال کے باعث قومی مفادات کو مدنظر رکھتے ہوئے پی ایس ایل 11 کو محدود کیا گیا ہے۔
انہوں نے شائقین کرکٹ سے معذرت کرتے ہوئے کہا کہ ملک و قوم کا وسیع تر مفاد سب سے پہلے ہوتا ہے۔

پی ایس ایل کو مزید آگے لے جانے کا عزم

چیئرمین پی سی بی نے کہا کہ پی ایس ایل ایک ٹاپ انٹرنیشنل برانڈ بن چکا ہے اور اسے مزید ترقی دینا ہمارا ہدف ہے۔
ان کا کہنا تھا کہ آج کی قربانی کل کی آسانی بن کر سامنے آئے گی۔

تقریب میں وفاقی وزراء محمد اورنگزیب، عطا اللہ تارڑ، سالک حسین اور علی پرویز ملک شریک ہوئے۔

اس کے علاوہ سپیکر پنجاب اسمبلی ملک محمد احمد خان، سینیئر صوبائی وزیر مریم اورنگزیب، صوبائی وزراء شافع حسین اور طلحہ برکی، اٹارنی جنرل منصور اعوان اور سابق وفاقی وزیر گوہر اعجاز بھی موجود تھے۔

تقریب میں پی ایس ایل فرنچائز اونرز، ٹیموں کے کپتان، ہیڈ کوچز، پاکستان نیشنل ٹیم کے کھلاڑی اور بین الاقوامی کرکٹرز نے بھی شرکت کی۔

تقریب میں معروف غیر ملکی کھلاڑی سکندر رضا، روی بوپارہ، تبریز شمسی، ٹم پین سمیت دیگر انٹرنیشنل پلیئرز بھی شریک ہوئے۔