وزیراعلیٰ بلوچستان سرفراز بگٹی نے صوبے میں نئے ضلعے کے قیام کا اعلان کردیا ہے۔
پشین کے علاقے برشور میں عوامی جلسے سے خطاب کرتے ہوئے سرفراز بگٹی نے کہا کہ برشور کو ضلع کا درجہ دے دیا گیا ہے اور اب علاقے میں ترقی کے نئے دور کا آغاز ہوگا۔ انہوں نے کہا کہ یہاں سرکاری اداروں کو مضبوط بنایا جائے گا تاکہ عوام کو بہتر سہولیات فراہم کی جاسکیں۔
یہ بھی پڑھیں: ’بلوچستان امن چاہتا ہے‘، وزیر اعلیٰ سرفراز بگٹی کا افغان حکومت کو سخت پیغام
ان کا کہنا تھا کہ صوبے کے تمام بند اسکول دوبارہ کھولے جائیں گے جبکہ عوام کو صحت کی معیاری سہولیات فراہم کی جائیں گی۔ انہوں نے خبردار کیا کہ اگر کسی نے اپنی ذمہ داریاں ادا نہ کیں تو اس کے خلاف کارروائی کی جائے گی۔
وزیراعلیٰ نے کہا کہ وہ بلوچستان کے ہر علاقے کا دورہ کرتے رہیں گے اور عوام کے درمیان جانے سے انہیں کوئی نہیں روک سکتا۔
افغانستان سے متعلق گفتگو کرتے ہوئے سرفراز بگٹی نے کہا کہ افغانستان پاکستان کا برادر ہمسایہ ملک ہے اور پاکستان نے 40 سال تک افغان عوام کی خدمت کی، تاہم اس کا مناسب صلہ نہیں ملا۔ انہوں نے کہا کہ افغان عوام ہمارے مسلمان بھائی ہیں۔
یہ بھی پڑھیں: وزیر اعلیٰ بلوچستان سرفراز بگٹی کا دورہ سوئی، رنگ روڈ اور گیس منصوبوں کا افتتاح
انہوں نے مزید کہا کہ پاکستان کا دفاع محفوظ ہاتھوں میں ہے اور فیلڈ مارشل جنرل عاصم منیر کی موجودگی میں کوئی بھی ملک کی ایک انچ زمین کو نقصان نہیں پہنچا سکتا۔
وزیراعلیٰ بلوچستان نے اس موقع پر ایران پر حملوں کے حوالے سے اسرائیل کی شدید مذمت بھی کی۔
