پاکستان کے سب سے بڑے موسیقی کے مقابلے پاکستان آئیڈل سیزن 2 کو جہاں ناظرین کی جانب سے بھرپور پذیرائی مل رہی ہے وہیں یہ شو مختلف تنازعات کا شکار بھی ہے۔ ابتدائی طور پر ججز پینل کو تنقید کا سامنا رہا، اس کے بعد پاکستان آئیڈل کے کنٹسٹنٹ ایم ابرار شاہد نے ججز پر سنگین الزامات لگاتے ہوئے کہا کہ انہیں شو چھوڑنے پر مجبور کیا گیا ہے۔
View this post on Instagram
اور اب شو ایک نئے تنازعے کی زد میں ہے۔ معروف فوٹوگرافر احسن قریشی نے شو اور اس کے منتظمین کے خلاف قانونی کارروائی کا آغاز کر دیا ہے۔ انہوں نے الزام عائد کرتے ہوئے کہ انہیں دھوکہ دیا گیا اور وعدہ شدہ ادائیگیاں نہیں کی گئیں اس لیے وہ انصاف کے لیے عدالت کا سہارا لے رہے ہیں۔
یہ بھی پڑھیں: ویڈیو: پاکستان آئیڈل میں معروف گلوکار راحت فتح علی خان کے بیٹے کی مایوس کن پرفارمنس
ان کا کہنا تھا کہ غور و فکر کے بعد میں نے پاکستان آئیڈل کے خلاف قانونی کیس دائر کیا ہے۔عدالت نے مقدمے کی سماعت شروع کر دی ہے۔ میں قانونی عمل کا احترام کرتا ہوں اور اپنا کیس مکمل شواہد کے ساتھ پیش کروں گا۔
ان کا کہنا تھا کہ میں سب سے درخواست کرتا ہوں کہ قیاس آرائیوں سے گریز کریں اور قانونی عمل کا احترام کریں۔
یہ بھی پڑھیں: پاکستان آئیڈل کے ججز پر تنقید توجہ حاصل کرنے کے لیے ہے‘، موسیقار ہارون شاہد کا حمیرا ارشد کو جواب
واضح رہے کہ ان دنوں’پاکستان آئیڈل سیزن 2‘ جاری ہے جس میں فواد خان کے ساتھ راحت فتح علی خان، بلال مقصود اور زیب بنگش ججز کے فرائض سرانجام دے رہے ہیں۔
