انیل کپور پھر نانا بن گئے، سونم کپور کے ہاں بیٹے کی پیدائش

بھارتی فلم انڈسٹری کے معروف اداکار انیل کپور کے گھر ایک بار پھر خوشیوں نے دستک دی ہے کیونکہ ان کی بیٹی سونم کپور کے ہاں دوسرے بیٹے کی پیدائش ہوئی ہے۔

یہ بھی پڑھیں: جھانوی کپور نے اسٹیج پر ’چاچو‘ انیل کپور کی نقل اتار کر محفل لوٹ لی

سونم کپور اور ان کے شوہر آنند آہوجا نے اتوار 29 مارچ کو اپنے دوسرے بچے کی آمد کی خوشخبری مداحوں کے ساتھ شیئر کی۔ اس خوشی کے موقع پر انیل کپور نے بھی سوشل میڈیا پر جذباتی پیغام جاری کیا۔

انیل کپور نے انسٹاگرام پر اپنی پوسٹ میں لکھا کہ ’اور یوں میرا دل پہلے سے بھی بڑا ہو گیا ہے۔ میرے ننھے مہمان، دنیا میں خوش آمدید، تم پہلے ہی بے حد پیارے ہو‘. انہوں نے اپنے بڑے نواسے وایو کپور آہوجا کے لیے پیغام دیتے ہوئے کہا کہ ’وایو اب تم بڑے بھائی بن گئے ہو اور مجھے یقین ہے کہ تم بہترین ثابت ہوگے‘۔

مزید پڑھیے: سونم کپور کنگ چارلس کی تقریب تاج پوشی میں مدعو، سوشل میڈیا پر ٹرولنگ

انہوں نے اپنی بیٹی اور داماد کا شکریہ ادا کرتے ہوئے مزید لکھا کہ ’نانا کا دل خوشی سے بھر گیا ہے۔ آخر میں انہوں نے اپنے ننھے نواسے کو محبت بھری زندگی کی دعا دی۔

واضح رہے کہ سونم کپور، جو 9 جون 1985 کو پیدا ہوئیں، بھارتی فلم انڈسٹری کی معروف اداکارہ رہ چکی ہیں اور انیل کپور اور سنیتا بھونانی کی بیٹی ہیں۔

مزید پڑھیں: ’پاکستان آنے کے لیے ترس رہا ہوں‘، انیل کپور کی ویڈیو دوبارہ وائرل

سونم کپور نے 8 مئی 2018 کو ممبئی میں روایتی سکھ تقریب کے تحت آنند آہوجا سے شادی کی تھی۔ اس جوڑے کے ہاں پہلا بیٹا وایو کپور آہوجا سنہ 2022 میں پیدا ہوا تھا۔