پاکستان کرکٹ بورڈ (پی سی بی) نے سینٹرل کنٹریکٹ کی خلاف ورزی پر قومی کرکٹر نسیم شاہ پر 2 کروڑ روپے جرمانہ عائد کردیا۔
پی سی بی کی ڈسپلنری کمیٹی نے فیصلہ سناتے ہوئے کہا ہے کہ نسیم شاہ کی جانب سے سینٹرل کنٹریکٹ کی خلاف ورزی کی گئی، جس پر انہیں 2 کروڑ روپے جرمانہ کیا جاتا ہے۔
بریکنگ:
پاکستان کرکٹ بورڈ کی جانب سے نسیم شاہ پر متنازع ٹویٹ کے بعد 2 کروڑ روپے جرمانہ عائد— ch sajjad Haider (@chsajjad844) March 30, 2026
واضح رہے کہ پاکستان سپر لیگ (پی ایس ایل) کی افتتاحی تقریب کے موقع پر وزیر اعلیٰ پنجاب مریم نواز قذافی اسٹیڈیم آئیں۔ اس موقع پر نسیم شاہ کے ایکس اکاؤنٹ سے ایک پوسٹ کی گئی تھی جس میں لکھا گیا کہ ’انہیں ملکہ کی طرح کیوں پروٹوکول دیا جارہا ہے‘؟ تاہم بعد ازاں ٹوئٹ ڈیلیٹ کرکے کہا گیا کہ نسیم شاہ کا ایکس اکاؤنٹ ہیک ہوگیا تھا۔
پاکستان کرکٹ بورڈ نے معاملے کا نوٹس لیتے ہوئے قومی کرکٹر نسیم شاہ کو شوکاز نوٹس جاری کیا تھا۔
نسیم شاہ کی جانب سے جواب موصول ہونے اور اس کا تفصیلی جائزہ لینے کے بعد 30 مارچ کو 3 رکنی ڈسپلنری کمیٹی نے کیس کی سماعت کی۔
کمیٹی نے نسیم شاہ کے مؤقف کا بغور جائزہ لینے کے بعد فیصلہ سنایا کہ غیر مشروط معافی کے باوجود وہ سینٹرل کنٹریکٹ کی متعدد شقوں کی خلاف ورزی کے مرتکب پائے گئے ہیں اور ان پر 2 کروڑ روپے جرمانہ عائد کیا گیا ہے۔
مزید پڑھیں: نسیم شاہ کی مریم نواز کیخلاف ٹوئٹ: فیاض چوہان نے کرکٹر کی تعریف پر فواد چوہدری پر تنقید کے تیر برسا دیے
پاکستان کرکٹ بورڈ (پی سی بی) کے مطابق نسیم شاہ نے اپنے سوشل میڈیا ایڈوائزر کو پہلے ہی برطرف کر دیا ہے، جبکہ پی سی بی اس ایڈوائزر کو بلیک لسٹ کرے گا تاکہ مستقبل میں وہ کسی بھی کھلاڑی کے ساتھ پی سی بی کے دائرہ اختیار میں کام نہ کر سکے۔
پی سی بی نے اس عزم کا اعادہ کیا ہے کہ وہ کھیل کے پیشہ ورانہ معیار، معاہدوں کی پاسداری اور کھیل کی ساکھ کو برقرار رکھنے کے لیے پرعزم ہے۔
