وزیراعظم شہباز شریف نے عالمی سطح پر تیل کی قیمتوں میں اضافے کے پیش نظر عوام کو ریلیف فراہم کرنے کے لیے وزارتِ خزانہ کو ہدایت دی ہے کہ وہ انٹرنیشنل مانیٹری فنڈ (IMF) سے پیٹرولیم لیوی کے معاملے پر فوری بات چیت کرے۔
مزید پڑھیں: 2026 معیشت کے لیے نہایت کٹھن سال، پیٹرولیم لیوی کا بوجھ عوام کو برداشت کرنا ہوگا، مزمل اسلم
ذرائع کے مطابق وزیراعظم نے ہدایت کی ہے کہ پiٹرول اور ڈیزل کی قیمتوں میں ممکنہ اضافے کو موجودہ لیویز میں رد و بدل کے ذریعے متوازن کیا جائے تاکہ عوام پر اضافی بوجھ نہ پڑے۔ اس وقت حکومت پیٹرول پر 100 روپے فی لیٹر اور ڈیزل پر 55 روپے فی لیٹر لیوی وصول کر رہی ہے، جو آئی ایم ایف پروگرام کی شرائط کا حصہ ہے۔
یہ پیشرفت ایسے وقت میں سامنے آئی ہے جب حکومت پہلے ہی عوام کو ریلیف دینے کے لیے 129 ارب روپے کی بھاری سبسڈی دے چکی ہے، جس کے لیے ترقیاتی بجٹ میں کٹوتی اور دیگر مدات سے بچت کی گئی۔
حکام کا کہنا ہے کہ امریکا اسرائیل ایران جنگ کے باعث عالمی منڈی میں تیل کی قیمتوں میں نمایاں اضافہ ہوا ہے، جس سے مقامی سطح پر بھی دباؤ بڑھ رہا ہے۔
مزید پڑھیں:پیٹرولیم لیوی بڑھنےکا امکان، کیا پیٹرول کی قیمت میں بڑا اضافہ ناگزیر ہوگا؟
ایک سینیئر سرکاری عہدیدار کے مطابق وزیراعظم کی ہدایت واضح ہے کہ ہر ممکن اقدام کیا جائے تاکہ عالمی قیمتوں میں اضافے کا بوجھ عوام تک منتقل نہ ہو۔ اس سلسلے میں وزارتِ خزانہ کو آئی ایم ایف کے ساتھ لیوی کے ڈھانچے میں ممکنہ تبدیلیوں پر تفصیلی تجاویز پیش کرنے کی ذمہ داری سونپی گئی ہے۔
