اسپیکر پنجاب اسمبلی ملک احمد خان نے کہا ہے کہ اگر پاکستان کی سفارتی کوششیں مشرق وسطیٰ میں جاری جنگ کو روکنے میں کامیاب ہو جاتی ہیں تو اس کا کریڈٹ وزیراعظم شہباز شریف اور فیلڈ مارشل سیّد عاصم منیر کو جائےگا۔
مزید پڑھیں: مشرق وسطیٰ میں امن کا مشن، اسحاق ڈار چین کا دورہ مکمل کرکے وطن پہنچ گئے
میڈیا سے گفتگو کرتے ہوئے انہوں نے کہاکہ پاکستان کو مسلم ممالک میں ایک اہم حیثیت حاصل ہے اور اگر پاکستانی سفارتکاری کامیاب ہوتی ہے تو یہ عالمی امن کے لیے ایک اہم پیش رفت ہوگی۔
ان کا کہنا تھا کہ دنیا کے امن کے لیے ضروری ہے کہ مشرق وسطیٰ میں جاری کشیدگی کا خاتمہ ہو۔
ملک احمد خان نے مزید کہاکہ پاکستان ایک ذمہ دار ریاست کے طور پر تنازع کے حل کے لیے اپنا سفارتی کردار ادا کر رہا ہے، تاہم انڈین میڈیا کی جانب سے ہمیشہ پاکستان کے خلاف پروپیگنڈا کیا جاتا رہا ہے۔
واضح رہے کہ پاکستان مشرق وسطیٰ میں جاری کشیدگی کے خاتمے کے لیے بھرپور سفارتی کردار ادا کررہا ہے، اور اس سلسلے میں گزشتہ دنوں پاکستان، سعودی عرب، ترکیہ اور مصر کے وزرائے خارجہ کی اہم بیٹھک بھی ہوئی۔
مزید پڑھیں: برطانیہ کو ایران جنگ میں گھسیٹنے نہیں دینگے، برطانوی وزیر اعظم کا دو ٹوک اعلان
اس کے بعد نائب وزیراعظم و وزیر خارجہ اسحاق ڈار نے چین کا دورہ بھی کیا، جس میں چینی ہم منصب سے ملاقات کے بعد مشرق وسطیٰ میں امن کے لیے 5 نکاتی منصوبہ پیش کیا گیا۔
