کراچی کے مصروف علاقے شارع فیصل پر واقع فائنانس اینڈ ٹریڈ سینٹر (ایف ٹی سی) کی عمارت میں بدھ کے روز لگنے والی آگ پر قابو پالیا گیا ہے۔
فائر بریگیڈ حکام کے مطابق آگ عمارت کی پہلی منزل پر بھڑکی۔
چیف فائر آفیسر ہمایوں احمد خان نے بتایا کہ اطلاع ملتے ہی فوری طور پر 2 فائر ٹینڈرز کے ہمراہ ایک اسنارکل بھی جائے وقوعہ پر روانہ کیے گئے، جہاں عملہ نے بالآخر آگ پر قابو پالیا ہے۔
یہ بھی پڑھیں: کراچی: آتشزدگی پر مکمل قابو پانے تک واٹر ٹینکرز کی فراہمی جاری رہے گی
حکام کا کہنا ہے کہ تاحال کسی جانی نقصان یا زخمی ہونے کی اطلاع موصول نہیں ہوئی، جبکہ آگ لگنے کی وجوہات کا تعین کیا جا رہا ہے۔
چیف فائر افسر کے مطابق آگ جم کے حصے میں لگی، دھواں بھر جانے کے باعث ریسکیو عملے کو مشکلات کا سامنا کرنا پڑا، تاہم بروقت کارروائی کے نتیجے میں آگ پر قابو پا لیا گیا۔
مزید پڑھیں:کراچی: کورنگی میں ہونے والی خوفناک آتشزدگی کی وجوہات سامنے آگئیں
حکام کے مطابق عمارت میں آگ بجھانے کے آلات تو موجود تھے، مگر مجموعی فائر سیفٹی انتظامات ناکافی پائے گئے۔
فائر افسر نے بتایا کہ واقعے میں کوئی جانی نقصان نہیں ہوا اور فی الحال کولنگ کا عمل جاری ہے تاکہ کسی بھی ممکنہ دوبارہ آگ بھڑکنے کے خدشے کو ختم کیا جا سکے۔
انہوں نے مزید کہا کہ کولنگ کا عمل مکمل ہونے کے بعد آگ لگنے کی وجوہات کا تعین کرنے کے لیے باقاعدہ تحقیقات کا آغاز کیا جائے گا۔
