وزیر دفاع خواجہ محمد آصف نے کہا ہے کہ پٹرول اور ڈیزل کی قیمتوں میں اضافہ کسی ایک ملک کا فیصلہ نہیں بلکہ خطے میں جاری جنگی کشیدگی، مسلم دشمنی اور جارحانہ اقدامات کے باعث پیدا ہونے والی عالمی صورتحال کا نتیجہ ہے۔ ان کے مطابق تیل پیدا کرنے والے مسلم ممالک اور وہ ریاستیں جن کی حدود سے ایندھن دنیا تک پہنچتا ہے، موجودہ حالات سے شدید متاثر ہو رہی ہیں۔
یہ بھی پڑھیں: پیٹرولیم مصنوعات کی قیمتوں میں اضافہ عالمی منڈی میں تیل کی قیمت بڑھنے کا نتیجہ ہے، حکومت کا قصور نہیں، رانا ثنااللہ
انہوں نے کہا کہ دنیا کے کئی ممالک میں ایندھن کی قلت اور ہنگامی صورتحال پیدا ہو چکی ہے جبکہ پاکستان میں سپلائی برقرار رکھنا حکومت کے لیے بڑا چیلنج تھا، جسے کامیابی سے سنبھالا گیا اور ملک کو قلت سے بچایا گیا۔ ان کا کہنا تھا کہ شدید معاشی دباؤ کے باعث قیمتوں میں اضافہ ناگزیر ہو گیا تھا، تاہم حکومت کو عوام کی مشکلات کا مکمل احساس ہے۔
پٹرول و ڈیزل کی قیمتوں میں اضافہ کسی ایک ملک کا فیصلہ نہیں بلکہ اسرائیلی کے جنگی جنون امسلم دشمنی اور جارحانہ عزائم کا نتیجہ ہے۔ جن مسلم ممالک سے پٹرول نکلتا ہے، یا جس کی حدود سے گزر کر دنیا تک پہنچتا ہے، اسرائیلی کے مسلمانوں کی نسل کشی کے جنون سے سب شدید متاثر ھو رہے ھیں۔…
— Khawaja M. Asif (@KhawajaMAsif) April 3, 2026
خواجہ آصف کے مطابق وفاق اور صوبوں نے ترقیاتی اخراجات اور غیر ضروری مصارف مؤخر کر کے مالی وسائل تیل کی قیمتوں کے دباؤ کو کم کرنے پر صرف کیے ہیں، اور حالات بہتر ہوتے ہی عوام کو فوری ریلیف دیا جائے گا۔
دوسری جانب وفاقی وزیر احسن اقبال نے کہا کہ پٹرولیم مصنوعات کی قیمتوں میں حالیہ اضافہ کسی حکومتی پالیسی کا نتیجہ نہیں بلکہ ایران سے جڑی جنگی صورتحال، عالمی منڈی میں تیل کی قیمتوں میں غیر معمولی اضافے، علاقائی کشیدگی اور سپلائی میں رکاوٹوں کا اثر ہے۔
پٹرولیم مصنوعات کی قیمتوں میں حالیہ اضافہ کسی حکومتی پالیسی کا نتیجہ نہیں بلکہ ایران سے جڑی جنگی صورتحال کے باعث عالمی منڈی میں تیل کی قیمتوں میں تاریخی اضافے، خطے میں کشیدگی اور سپلائی میں رکاوٹوں کا نتیجہ ہے۔ یہ ایک عالمی بحران ہے جس کا سامنا صرف پاکستان نہیں بلکہ دنیا کے تمام…
— Ahsan Iqbal (@betterpakistan) April 3, 2026
ان کا کہنا تھا کہ یہ ایک عالمی بحران ہے جس کا سامنا صرف پاکستان نہیں بلکہ دنیا کے دیگر ممالک بھی کر رہے ہیں، جبکہ حکومت کے پاس قیمتوں کو مصنوعی طور پر کم رکھنے کی گنجائش موجود نہیں تھی۔ انہوں نے کہا کہ ماضی میں ایسے اقدامات معیشت کو نقصان پہنچا چکے ہیں، اس لیے تمام صوبوں کی مشاورت سے ذمہ دارانہ حکمت عملی اپنائی گئی۔
یہ بھی پڑھیں: پیٹرولیم مصنوعات کی اسمگلنگ اور ذخیرہ اندوزی کے خلاف سخت اقدامات کیے جائیں، وزیراعظم کی ہدایت
احسن اقبال نے مزید کہا کہ حکومت معیشت کے استحکام کو ترجیح دے رہی ہے اور کمزور طبقات کے تحفظ کے لیے اقدامات بھی کیے گئے ہیں۔ ان کے مطابق موجودہ صورتحال عارضی ہے اور عالمی حالات بہتر ہوتے ہی اس کا فائدہ عوام تک منتقل کیا جائے گا، جبکہ اس وقت قومی یکجہتی اور ذمہ داری کا مظاہرہ ضروری ہے۔
