اسپین کے جنوبی شہر مالاگا میں بُل فائٹ سے قبل ایک افسوسناک واقعہ پیش آیا جہاں ایک ریٹائرڈ میٹاڈور بیل کے حملے میں ہلاک ہو گیا۔ منتظمین کے مطابق یہ واقعہ جمعہ کے روز تاریخی بیل رنگ ‘لا مالاگیتا’ میں پیش آیا۔
اطلاعات کے مطابق 51 سالہ ریکارڈو اورتیز بیل فائٹ سے پہلے جانوروں کو ان کے باڑوں میں سنبھال رہے تھے کہ اسی دوران ایک بیل نے اچانک حملہ کر دیا اور انہیں شدید زخمی کر دیا، جو جان لیوا ثابت ہوا۔ واقعے کی تصدیق ایونٹ کے منتظم ادارے کی جانب سے جاری بیان میں کی گئی۔
یہ بھی پڑھیے: اسپین میں ہنی بال کے جنگی ہاتھی کے ممکنہ آثار دریافت
بیان میں کہا گیا کہ مرحوم بیل فائٹنگ کی دنیا میں نہایت محترم اور مقبول شخصیت تھے اور ان کی خدمات کو ہمیشہ یاد رکھا جائے گا۔ منتظمین نے اہل خانہ، دوستوں اور ساتھیوں سے دلی ہمدردی کا اظہار بھی کیا۔
رپورٹس کے مطابق ریکارڈو اورتیز 1974 میں مالاگا میں پیدا ہوئے اور ایک ایسے خاندان سے تعلق رکھتے تھے جو نسلوں سے بیل فائٹنگ سے وابستہ رہا ہے۔ انہوں نے اپنے کیریئر میں متعدد کامیاب مقابلوں میں حصہ لیا۔
یہ بھی پڑھیے: پولیس نے بروقت کارروائی کرتے ہوئے دیسی بل فائٹنگ کا میلہ ناکام بنا دیا
یہ واقعہ ایک روز قبل پیش آیا جب اسی میدان میں معروف مصور پابلو پیکاسو کے نام سے منسوب خصوصی بیل فائٹ منعقد ہونا تھی، جس میں تین میٹاڈورز کو چھ بیلوں کا سامنا کرنا تھا۔
واضح رہے کہ بیل فائٹنگ اسپین کی روایتی ثقافت کا حصہ سمجھی جاتی ہے، تاہم حالیہ برسوں میں اس پر شدید تنقید کی جا رہی ہے۔ جانوروں کے حقوق کے کارکنان اس کھیل کو غیر انسانی قرار دیتے ہیں، جبکہ دنیا بھر میں اس روایت میں کمی دیکھنے میں آ رہی ہے۔
