وزارت اطلاعات و نشریات نے نام نہاد افغان ترجمان کا جھوٹا اور گمراہ کن پروپیگنڈا بے نقاب کردیا۔
وزارت اطلاعات نے کہا ہے کہ نام نہاد افغان ترجمان حمداللہ فطرت ایک بار پھر جھوٹ اور گمراہ کن بیان کے ساتھ سامنے آئے ہیں۔ یہ بات ثابت شدہ ہے کہ پاکستان نے افغانستان میں صرف فتنہ الخوارج اور افغان طالبان کے دہشتگرد انفراسٹرکچر کو انتہائی درستگی کے ساتھ نشانہ بنایا۔
مزید پڑھیں: آپریشن غضب للحق جاری: 796 دہشتگرد ہلاک، 44 چوکیوں پر قبضہ کرلیا گیا
بیان میں کہا گیا ہے کہ درست فضائی حملوں، چوکیوں کی تباہی اور قبضے، افغان طالبان رجیم اور فتنہ الخوارج کے کارندوں کی ہلاکتوں اور زخمیوں سے متعلق اعداد و شمار باقاعدگی سے اپ ڈیٹ کیے جاتے ہیں جبکہ حملوں کی ویڈیوز بھی جاری کی جاتی ہیں۔
وزارت اطلاعات نے کہاکہ اس کے برعکس پوری دنیا بھارتی سرپرستی میں قائم افغان طالبان رجیم اور اس کے حمایت یافتہ دہشتگرد پراکسیز کی جانب سے کیے گئے حملوں کی گواہ ہے جیسا کہ حالیہ بزدلانہ حملہ ڈومیل، بنوں میں ہوا جہاں خواتین اور بچوں سمیت 10 شہری شہید ہوئے۔
بیان کے مطابق افغان شہریوں کو پاکستان میں دہشتگرد سرگرمیوں کے لیے مسلسل استعمال کیے جانے کے شواہد بھی منظر عام پر آ چکے ہیں اور عوامی سطح پر دستیاب ہیں جن میں آج 5 اپریل کو بلوچستان کے وزیر داخلہ کی کانفرنس میں پیش کی گئی معلومات بھی شامل ہیں۔
وزارت اطلاعات نے بتایا کہ ایک اور ٹھوس حقیقت یہ ہے کہ افغانستان کے اندر دہشتگرد قیادت کو پناہ اور تحفظ فراہم کیا جا رہا ہے، اور اقوام متحدہ اور دیگربین الاقوامی رپورٹس افغان طالبان رجیم کی سرپرستی میں درجنوں دہشتگرد پراکسیز کی موجودگی کی تصدیق کرتی ہیں۔
مزید پڑھیں: افغانستان کی سرزمین پر ہزاروں دہشتگرد موجود، شہریوں کو ڈھال کے طور پر استعمال کیا جانے لگا
بیان میں کہا گیا ہے کہ حمداللہ فطرت اور افغان طالبان رجیم کے دیگر ترجمان باقاعدگی سے جعلی، پرانی اور حتیٰ کہ مصنوعی ذہانت سے تیار کردہ پروپیگنڈا ویڈیوز اور دعوے پوسٹ کرتے رہتے ہیں جنہیں صرف ان کے بھارتی آقاؤں اور ان کے پروپیگنڈا نیٹ ورک کی سرپرستی حاصل ہوتی ہے، لیکن سچ ہمیشہ جھوٹ پر غالب آتا ہے۔
