پاکستانی اداکارہ سجل علی نے ملک میں پیٹرول کی قیمتوں میں حالیہ اضافے کے بعد عوام سے درخواست کی ہے کہ وہ ڈیلیوری رائیڈرز اور ٹیکسی ڈرائیورز کو یاد رکھیں اور انہیں سخاوت کے ساتھ ٹِپ دیں۔
سجل علی نے اپنے انسٹاگرام اسٹوری پر لکھا کہ جو لوگ ہمیں کھانا ڈیلیور کرتے ہیں اور ہمیں ایک جگہ سے دوسری جگہ لے جاتے ہیں وہ اپنا پورا دن سڑک پر گزارتے ہیں اور پیٹرول کی قیمتوں میں اضافے کے ساتھ ان کے لیے حالات مزید مشکل ہوتے جا رہے ہیں۔
اداکارہ نے عوام کو مشورہ دیا کہ ایسے حالات میں محنت کشوں کے ساتھ ہمدردی کا مظاہرہ کریں اور اگر ممکن ہو تو انہیں مناسب ٹِپ ضرور دیں۔ ان کے مطابق معمولی تعاون بھی ان کے لیے بڑی سہولت کا سبب بن سکتا ہے اور ٹِپ دینا کم از کم کچھ مدد کا ذریعہ ہو سکتا ہے۔
واضح رہے کہ حکومت نے حال ہی میں پیٹرول کی قیمت میں نمایاں اضافہ کرتے ہوئے اسے 321 روپے سے بڑھا کر 458 روپے فی لیٹر کر دیا تھا جس پر عوام میں شدید ردعمل دیکھا گیا۔ اگلے دن حکومت نے ریلیف کا اعلان کرتے ہوئے قیمت میں 80 روپے کی کمی کی۔ تاہم پٹرول کی قیمت اب بھی تاریخی بلند سطح پر برقرار ہے۔
