اسلام آباد ہائیکورٹ میں القادر ٹرسٹ کیس کی سماعت کل تک منسوخ ہونے پر بانی پی ٹی آئی عمران خان کی بہنوں نے عدالت کے باہر دھرنا دے دیا، بعد ازاں کل تک کی تاریخ ملنے پر انہوں نے احتجاج ختم کردیا۔
اسلام آباد ہائیکورٹ میں القادر ٹرسٹ اور 190 ملین پاؤنڈ کیس کی سماعت منسوخ ہونے کے بعد بانی پی ٹی آئی کی بہنوں نے عدالت کے باہر دھرنا دے دیا ہے۔ علیمہ خان نے واضح کیا ہے کہ جب تک کیس کی نئی تاریخ نہیں دی جاتی، وہ احتجاج ختم نہیں کریں گی۔
ذرائع کے مطابق بانی پی ٹی آئی اور ان کی اہلیہ بشریٰ بی بی کے خلاف کیس کی آج ہونے والی سماعت بنچ کی عدم دستیابی کے باعث منسوخ کر دی گئی، جس کے نتیجے میں عدالت کی آج کی کاز لسٹ بھی ختم کر دی گئی۔
عدالتی ذرائع کا کہنا ہے کہ چیف جسٹس سرفراز ڈوگر نیشنل جوڈیشل پالیسی میکنگ کمیٹی کے اجلاس میں مصروف تھے، جس کے باعث وہ آج سنگل بنچ میں مقدمات کی سماعت نہیں کر سکے۔ ان کی عدم دستیابی کے باعث سنگل بنچ کی مکمل کاز لسٹ منسوخ کی گئی۔
تاہم عدالت کے ڈویژن بنچ میں کیسز کی سماعت جاری ہے، جہاں 190 ملین پاؤنڈ کیس میں سزا معطلی کی درخواستوں پر غور کیا جا رہا ہے۔
سماعت منسوخ ہونے پر بانی پی ٹی آئی کی بہنوں نے عدالت کے باہر احتجاج شروع کر دیا، جو بعد ازاں دھرنے کی شکل اختیار کر گیا۔ مظاہرین کا مطالبہ تھا کہ کیس کی فوری نئی تاریخ مقرر کی جائے تاکہ قانونی کارروائی آگے بڑھ سکے۔ بعدازاں اسلام آباد ہائیکورٹ نے کل سماعت کے لیے مقرر کیا۔ اور مظاہرین نے دھرنا ختم کردیا۔
