وفاقی آئینی عدالت میں انکم ٹیکس آرڈیننس 2001 کے سیکشن 7ای کی تشریح اور اس کی آئینی حیثیت سے متعلق اہم کیس کی سماعت ہوئی۔
چیف جسٹس امین الدین خان کی سربراہی میں دو رکنی بینچ نے کیس کی سماعت کی۔
سماعت کے دوران عدالت نے اسلام آباد ہائی کورٹ میں سیکشن 7ای سے متعلق زیر التوا مقدمات طلب کر لیے اور آئندہ ہفتے سے کیس کو روزانہ کی بنیاد پر سننے کا فیصلہ کیا۔
یہ بھی پڑھیے: ایف بی آر کو مالی سال کے 9 ماہ میں 610 ارب روپے کا خسارہ، ہدف حاصل کرنا مشکل
ایف بی آر کی جانب سے وکیل حافظ احسان کھوکھر اور عصمہ حامد عدالت میں پیش ہوئے۔ اس موقع پر حافظ احسان کھوکھر نے مؤقف اختیار کیا کہ اس معاملے سے متعلق اپیلیں اسلام آباد ہائی کورٹ میں زیر التوا ہیں، لہٰذا انہیں وفاقی آئینی عدالت میں منتقل کیا جائے۔
عدالت نے ایف بی آر کی استدعا منظور کرتے ہوئے اسلام آباد ہائی کورٹ سے زیر التوا مقدمات کا مکمل ریکارڈ طلب کر لیا۔
عدالت کے اس اقدام کو ماہرین کی جانب سے اہم قرار دیا جا رہا ہے، جس سے سیکشن 7ای کی آئینی حیثیت سے متعلق معاملے پر جلد پیش رفت متوقع ہے۔
