پاکستان میڈیکل اینڈ ڈینٹل کونسل (پی ایم ڈی سی) نے ایم ڈی کیٹ کے پاسنگ مارکس میں کمی کرتے ہوئے تمام میڈیکل و ڈینٹل جامعات کو 15 اپریل 2026 تک داخلوں کا عمل مکمل کرنے کی ہدایت جاری کر دی ہے۔
کونسل کے مطابق خالی نشستوں کو پُر کرنے کے لیے پاسنگ پرسنٹیج میں 3 فیصد رعایت دی گئی ہے۔
اس فیصلے کے تحت ایم بی بی ایس کے لیے پاسنگ مارکس 55 فیصد سے کم کر کے 52 فیصد جبکہ بی ڈی ایس کے لیے 50 فیصد سے کم کر کے 47 فیصد مقرر کر دیے گئے ہیں۔
پی ایم ڈی سی نے ہدایت کی ہے کہ داخلوں کے عمل میں پہلے سے اہل امیدواروں کو ترجیح دی جائے، جبکہ نشستیں خالی رہنے کی صورت میں نئی رعایت کا اطلاق کیا جائے گا۔
جاری نوٹیفکیشن میں نجی میڈیکل اداروں کو مستحق طلبہ کے لیے فیسوں میں کمی کرنے کی بھی ہدایت کی گئی ہے، جبکہ میرٹ اور شفافیت کو ہر صورت یقینی بنانے پر زور دیا گیا ہے۔
کونسل نے خبردار کیا ہے کہ مقررہ فیس سے زیادہ وصول کرنے والے اداروں کے خلاف سخت کارروائی عمل میں لائی جائے گی۔
