معروف اداکار مائیکل پیٹرک طویل علالت کے بعد 35 برس کی عمر میں انتقال کر گئے۔ وہ گزشتہ تین سال سے موٹر نیورون ڈیزیزمیں مبتلا تھے۔
اداکار کی اہلیہ ناؤمی شیہان نے انسٹاگرام پوسٹ کے ذریعے ان کے انتقال کی تصدیق کی۔ انہوں نے بتایا کہ مائیکل کو دس روز قبل ان کے آبائی علاقے شمالی آئرلینڈ کے ایک ہاسپِس میں منتقل کیا گیا تھا جہاں انہیں 24 گھنٹے طبی نگہداشت فراہم کی جا رہی تھی۔
View this post on Instagram
ناؤمی شیہان نے اپنے شوہر کو خراجِ عقیدت پیش کرتے ہوئے کہا کہ وہ ایک غیر معمولی شخصیت کے حامل انسان تھے جنہوں نے اپنی زندگی کے ہر مرحلے میں لوگوں کو متاثر کیا۔ ان کے بقول مائیکل نے اپنی بیماری کے باوجود ہمت اور حوصلے کی مثال قائم کی۔
مائیکل پیٹرک اسٹیج پر اپنی شاندار اداکاری کے باعث نمایاں مقام رکھتے تھے۔ انہوں نے بیماری کے باوجود فنِ اداکاری کا سلسلہ جاری رکھا۔ شیکسپیئر کے مشہور ڈرامے The Tragedy of Richard III میں ان کی وہیل چیئر پر مبنی کارکردگی کو بے حد سراہا گیا جس پر انہیں گزشتہ برس اسٹیج ایوارڈز میں ججز ایوارڈ سے نوازا گیا۔
ٹیلی وژن کے میدان میں بھی انہوں نے خدمات انجام دیں اور شہرۂ آفاق سیریز Game of Thrones کے چھٹے سیزن میں ایک کردار ادا کیا۔ علاوہ ازیں وہ بی بی سی کی سیریز My Left Nut کے شریک مصنف بھی تھے جسے رائل ٹیلی ویژن سوسائٹی کی جانب سے تین اعزازات سے نوازا گیا۔
ان کے انتقال پر فنونِ لطیفہ سے وابستہ شخصیات اور اداروں نے گہرے رنج و غم کا اظہار کیا ہے اور انہیں ایک باصلاحیت اور باحوصلہ فنکار قرار دیا ہے جن کی خدمات کو طویل عرصے تک یاد رکھا جائے گا۔
