امریکا اور ایران کے درمیان ہونے والے اہم مذاکرات میں شرکت کے بعد ایران کا اعلیٰ سطح کا وفد اسلام آباد سے روانہ ہو گیا ہے۔
نور خان ایئر بیس پر نائب وزیر اعظم و وزیر خارجہ محمد اسحاق ڈار، چیف آف ڈیفنس فورسز و فیلڈ مارشل سید عاصم منیر، سپیکر قومی اسمبلی سردار ایاز صادق اور وزیر داخلہ محسن نقوی نے ایرانی وفد کو الوداع کہا۔
یہ بھی پڑھیں: امن مذاکرات: وزیراعظم سے ایرانی وفد کی ملاقات، شہباز شریف کا خطے میں امن و استحکام کے لیے کردار جاری رکھنے کا عزم
ایرانی وفد میں مجلس شوریٰ کے اسپیکر محمد باقر قالیباف اور وزیر خارجہ عباس عراقچی شامل تھے۔ اس موقع پر وفاقی وزراء اور عسکری قیادت کی موجودگی اس دورے کی سفارتی اور تزویراتی اہمیت کی عکاسی کرتی ہے۔
پاکستانی قیادت نے ایرانی وفد کی آمد اور مذاکرات کے عمل میں ان کی شرکت کو سراہتے ہوئے علاقائی امن و سلامتی کے لیے پاکستان کے پختہ عزم کا اعادہ کیا۔
یہ بھی پڑھیں: اسلام آباد مذاکرات کے بعد امریکی نائب صدر جے ڈی وینس امریکا روانہ، اعلیٰ قیادت نے رخصت کیا
ایرانی وفد کی روانگی کے موقع پر الوداعی جملوں کا تبادلہ بھی ہوا، جس میں اسلام آباد میں ہونے والے ان مذاکرات کو مستقبل کے سفارتی تعلقات کے لیے ایک اہم سنگِ میل قرار دیا گیا۔
پاکستان نے ایک بار پھر واضح کیا ہے کہ وہ خطے میں کشیدگی کے خاتمے اور برادر اسلامی ممالک سمیت عالمی قوتوں کے درمیان ڈائیلاگ کے لیے اپنا بھرپور کردار ادا کرتا رہے گا۔
