فائر فائٹنگ حکام نے پالتو جانور رکھنے والوں کو خبردار کیا ہے کہ وہ اپنے گھروں میں موجود لیتھیم بیٹریوں کو محفوظ رکھیں کیونکہ یہ جانوروں کے لیے خطرناک ہونے کے ساتھ آگ لگنے کا سبب بھی بن سکتی ہیں۔
یہ بھی پڑھیں: کتے انسانوں کے دوست کتنے ہزار سال پہلے بنے؟
یہ وارننگ برطانیہ میں اس واقعے کے بعد جاری کی گئی جس میں ایک پالتو کتے نے بچے کے کھلونے میں موجود بیٹری کو چبا لیا اور جس کے نتیجے میں گھر کے اندر جلنے کی بو پھیل گئی۔
فائر فائٹرز کے مطابق بیٹری چبانے کے باعث اس میں نقصان ہوا اور چنگاری پیدا ہوئی جس سے کتے کے بستر کا کچھ حصہ جل گیا۔ خوش قسمتی سے بروقت صورتحال پر قابو پا لیا گیا تاہم حکام کا کہنا ہے کہ اگر دیر ہو جاتی تو بڑا حادثہ پیش آ سکتا تھا۔
مزید پڑھیے: کتوں کے لیے ٹی وی کا بڑھتا رجحان لیکن کیا وہ واقعی اسکرین پر توجہ دیتے ہیں؟
ریسکیو اداروں نے زور دیا ہے کہ گھروں میں استعمال ہونے والی لیتھیم آئن بیٹریاں، جو کھلونوں، ویپ ڈیوائسز اور کار کی چابیوں سمیت کئی اشیا میں ہوتی ہیں، انہیں بچوں اور پالتو جانوروں کی پہنچ سے دور رکھا جائے۔
ان کا کہنا ہے کہ حالیہ برسوں میں اس طرح کے واقعات میں اضافہ ہوا ہے اور معمولی لاپرواہی بھی بڑے خطرے میں تبدیل ہو سکتی ہے۔
مزید پڑھیں: کتے نے ابتدائی اسٹیج کینسر کی نشاندہی کرکے مالکن کی جان بچالی
ماہرین کا کہنا ہے کہ پالتو جانور اکثر تجسس میں چھوٹی اشیا منہ میں ڈال لیتے ہیں اس لیے مالکان کی ذمہ داری ہے کہ وہ اپنے گھروں کو محفوظ بنائیں اور خاص طور پر بیٹری جیسی خطرناک چیزوں کو کھلا نہ چھوڑیں تاکہ کسی بھی ممکنہ حادثے سے بچا جا سکے۔
