امریکی صدر ڈونلڈ ٹرمپ نے پوپ لیو 16 کو سخت تنقید کا نشانہ بناتے ہوئے انہیں خارجہ پالیسی میں ناکام اور جرائم کے معاملے پر کمزور قرار دے دیا۔
ٹرمپ نے سوشل میڈیا پلیٹ فارم ٹروتھ سوشل پر اپنے بیان میں کہا کہ پوپ لیو جرائم کے حوالے سے کمزور ہیں اور خارجہ پالیسی کے لیے اچھے نہیں ہیں۔ بعد ازاں انہوں نے صحافیوں سے گفتگو میں بھی کہا کہ وہ پوپ کے بڑے مداح نہیں ہیں۔
مزید پڑھیں: اسرائیلی حملوں اور سیاسی بے یقینی کے درمیان پوپ لیو کا مصروف دورہ لبنان
یہ بیان ایسے وقت میں سامنے آیا جب پوپ لیو 16 امریکی پالیسیوں، خاص طور پر ایران جنگ اور امیگریشن سے متعلق پالیسیوں پر تنقید کر چکے ہیں۔
پوپ، جو گزشتہ سال پہلے امریکی نژاد پوپ بنے، نے ایران میں جاری جنگ کو ہولناک قرار دیتے ہوئے عالمی رہنماؤں پر زور دیا تھا کہ وہ تشدد میں کمی لانے کے لیے اقدامات کریں۔
انہوں نے امریکی صدر کی جانب سے ایران کے خلاف سخت بیانات کو بھی ناقابل قبول قرار دیا تھا اور کہا تھا کہ جنگیں شروع کرنے والے رہنماؤں کی دعائیں قبول نہیں ہوتیں۔
امیگریشن کے معاملے پر بھی پوپ لیو نے امریکی پالیسیوں پر سوال اٹھاتے ہوئے کہا تھا کہ مہاجرین کے ساتھ غیر انسانی سلوک چرچ کی تعلیمات کے خلاف ہے۔
مزید پڑھیں: پوپ لیو کی پہلے غیرملکی دورے کے دوران استنبول کی مشہور سلطان احمد مسجد آمد
دوسری جانب ٹرمپ نے پوپ کو ’لبرل سوچ رکھنے والا‘ قرار دیتے ہوئے الزام لگایا کہ وہ جرائم کی روک تھام کے حوالے سے سنجیدہ نہیں ہیں۔
واضح رہے کہ ٹرمپ کا ویٹیکن کے ساتھ تعلقات ماضی میں بھی کشیدہ رہے ہیں، اور انہوں نے سابق پوپ پر بھی تنقید کی تھی۔
