شمالی کوریا نے اتوار کے روز اپنے جنگی جہاز ‘چوئے ہیون’ سے اسٹریٹیجک کروز میزائل اور اینٹی وار شپ میزائلوں کا ایک اور تجربہ کیا، جس کی تصدیق سرکاری خبر رساں ادارے ‘کے سی این اے’ نے منگل کو کی۔
رپورٹ کے مطابق کم جونگ اُن نے سینیئر دفاعی حکام اور بحری کمانڈرز کے ہمراہ اس تجربے کا مشاہدہ کیا۔ اس دوران دو2 کروز میزائل اور 3 اینٹی شپ میزائل فائر کیے گئے تاکہ جہاز کے مربوط ہتھیاروں کے کمانڈ سسٹم، عملے کی تربیت، اور جدید نیویگیشن نظام کی درستگی اور اینٹی جیمنگ صلاحیتوں کا جائزہ لیا جا سکے۔
یہ بھی پڑھیے: جنوبی کوریا کا شمالی کوریا میں ڈرون بھیجنے کا اعتراف، اظہار افسوس بھی کردیا
کروز میزائل تقریباً 7,869 سے 7,920 سیکنڈ تک پرواز کرتے رہے جبکہ اینٹی وار شپ میزائل 1,960 سے 1,973 سیکنڈ تک فضا میں رہے اور مغربی ساحلی علاقوں کے قریب اپنے اہداف کو انتہائی درستگی سے نشانہ بنایا۔
‘کے سی این اے’ کے مطابق کم جونگ اُن کو اسی روز زیرِ تعمیر مزید دو جنگی جہازوں کے ہتھیاری نظام پر بھی بریفنگ دی گئی، جس سے ظاہر ہوتا ہے کہ ‘چوئے ہیون’ کلاس کے تیسرے اور چوتھے جہاز کی تیاری جاری ہے۔
کم جونگ اُن نے کہا کہ ملک کی جوہری دفاعی صلاحیت کو مضبوط بنانا اولین ترجیح ہے اور اس مقصد کے لیے اسٹریٹیجک و ٹیکٹیکل حملہ آور صلاحیتوں اور فوری ردعمل کی تیاری کو مزید بہتر بنانے کی ضرورت ہے۔
یہ بھی پڑھیے: امریکا پر کئی وار ہیڈ برسانے والے میزائل کی تیاری؟ شمالی کوریا کا نیا تجربہ اہم پیش رفت قرار
ماہرین کے مطابق شمالی کوریا تیزی سے اپنے بحری بیڑے کو وسعت دے رہا ہے اور عالمی سطح پر جاری کشیدگی سے فائدہ اٹھاتے ہوئے اپنے دفاعی اور جوہری پروگرام کو مزید آگے بڑھا رہا ہے۔
