سیکیورٹیز اینڈ ایکسچینج کمیشن آف پاکستان نے کوکو ٹیک پاکستان (پرائیویٹ) لمیٹڈ کو پاکستان میں نان بینکنگ فائنانس کمپنی کا لائسنس جاری کر دیا ہے۔
کوکو ٹیک پاکستان، بین الاقوامی شہرت یافتہ کمپنی علی بابا کی ذیلی کمپنی ہے، جو پاکستانی صارفین کو قسطوں پر اشیا کی خریداری کے لیے ڈیجیٹل مالیاتی خدمات فراہم کرے گی۔
یہ بھی پڑھیں: علی بابا گروپ نے بھی اپنی اے آئی ایپ کا نیا ماڈل لانچ کردیا
علی بابا دنیا کی صفِ اول کی ای کامرس اور ٹیکنالوجی کمپنیوں میں شامل ہے، اس کمپنی کی پاکستان میں سرمایہ کاری ملک کے ڈیجیٹل مالیاتی نظام کے فروغ کے لیے ایک اہم پیش رفت ہے۔
چیئرمین ایس ای سی پی، ڈاکٹر کبیر احمد سدھو کا کہنا ہے کہ علی بابا گروپ جیسے بڑے ای کامرس ادارے کی شمولیت سے پاکستانی مارکیٹ میں مقابلے اور جدت کو فروغ ملے گا۔
@AlibabaGroup steps into PK🇵🇰@SECPakistan has granted a license to Cocotech PK, a company linked to Alibaba. Cocotech will introduce BNPL services allowing consumers to purchase products online and pay in easy installments over time. #DigitalNationPakistan pic.twitter.com/YsGPzZXxjU
— Ministry of IT & Telecom (@MoitOfficial) April 14, 2026
ڈاکٹر سدھو نے کہا کہ پاکستان اپنی بڑی آبادی، بڑھتی ہوئی ڈیجیٹلائزیشن اور بہتر ریگولیٹری فریم ورک کی بدولت بین الاقوامی سرمایہ کاری کے لیے ایک پرکشش منزل ہے۔
علی بابا کی سرمایہ کاری پاکستان کی بڑی صارف مارکیٹ، تیزی سے بڑھتی ڈیجیٹل معیشت اور مالیاتی خدمات کے شعبے میں موجود مواقع پر بین الاقوامی سرمایہ کاروں کے اعتماد کا مظہر ہے۔
کوکو ٹیک پاکستان، علی بابا کے تجربے، جدید مصنوعی ذہانت پر مبنی کریڈٹ اسیسمنٹ نظام اور عالمی سطح پر آزمودہ ڈیجیٹل انفرا اسٹرکچر کے ذریعے صارفین کو تیز رفتار اور قابلِ اعتماد مالیاتی خدمات فراہم کرے گی۔
مزید پڑھیں: ڈیپ سیک کی ’جینیئس اے آئی گرل‘ کون ہے؟
اس سے خاص طور پر نوجوانوں، فری لانسرز اور چھوٹے کاروباروں کے لیے مالی سہولیات تک رسائی بہتر ہوگی، جو روایتی بینکاری نظام سے مکمل طور پر مستفید نہیں ہو پاتے۔
علی بابا کی بین الاقوامی شہرت، تجربے اور مالی وسائل کی بدولت کوکو ٹیک پاکستان چھوٹے اور درمیانے درجے کے کاروباروں کو معاونت فراہم کرے گی اور ملک میں جدید ای کامرس کے فروغ میں اہم کردار ادا کرے گی۔
