حکومت پنجاب نے غیر منقولہ جائیداد کے مالکان کو بڑا ریلیف دینے کا فیصلہ کرتے ہوئے اسٹامپ ڈیوٹی 3 فیصد سے کم کرکے 1 فیصد کرنے کا اعلان کیا ہے۔
مزید پڑھیں: ڈیجیٹل پنجاب کی جانب پیشقدمی، حکومت پنجاب اور بینک آف پنجاب کے درمیان مفاہمتی یاد داشت پر دستخط
اس حوالے سے اسٹامپ (ترمیمی) آرڈیننس پنجاب اسمبلی میں پیش کر دیا گیا، جس کے تحت اسٹامپ ایکٹ 1899 میں اہم ترامیم تجویز کی گئی ہیں۔ آرڈیننس کے متن کے مطابق دیہی علاقوں میں اسٹامپ ڈیوٹی کو 3 فیصد سے کم کر کے 1 فیصد کرنا یکساں نظام کے قیام کے لیے ضروری قرار دیا گیا ہے۔
اس وقت شہری علاقوں میں اسٹامپ ڈیوٹی 1 فیصد جبکہ دیہی علاقوں میں 3 فیصد ہے، جس کے باعث مختلف مسائل جنم لے رہے ہیں۔ مجوزہ ترامیم کے ذریعے اس فرق کو ختم کرکے یکساں شرح نافذ کرنے کی کوشش کی جا رہی ہے۔
آرڈیننس میں قابلِ منتقلی معاہدوں کو بھی اسٹامپ ایکٹ 1899 کا حصہ بنانے کی تجویز شامل ہے، تاکہ قانون کو مزید مؤثر بنایا جا سکے۔
گورنر پنجاب اس ترمیمی آرڈیننس کی منظوری 10 اپریل کو دے چکے ہیں، جبکہ یہ آرڈیننس 90 دن کے لیے نافذ العمل ہوگا۔ اسے مزید غور کے لیے متعلقہ کمیٹی کے سپرد کر دیا گیا ہے، جو دو ماہ میں اپنی رپورٹ پیش کرے گی۔
مزید پڑھیں: حکومت پنجاب اور ٹرانسپورٹرز کے درمیان معاملات طے پا گئے، مریم نواز کا اہم اعلان
کمیٹی کی سفارشات کے بعد آرڈیننس کو ایوان سے منظور کروایا جائے گا، جس کے بعد یہ باقاعدہ قانون کی شکل اختیار کر لے گا۔
