ملک بھر کے ہوائی اڈوں سے حج آپریشن 2026 کا باقاعدہ آغاز ہو گیا، جہاں سے پہلی پرواز کراچی کے جناح انٹرنیشنل ایئرپورٹ سے 160 عازمینِ حج کو لے کر حجازِ مقدس روانہ ہوئی، جبکہ اس سال ہزاروں پاکستانی فریضہ حج کی ادائیگی کے لیے سعودی عرب جائیں گے۔
یہ بھی پڑھیں:حج 2026 کے لیے پروازوں کا شیڈول جاری کردیا گیا
کراچی سے نجی ایئر لائن ایئر سیال کی پرواز PF-7700 علی الصبح 2 بج کر 5 منٹ پر 160 عازمین کو لے کر روانہ ہوئی، جس کے ساتھ ہی پری حج آپریشنز کا باقاعدہ آغاز ہو گیا۔ اس موقع پر جناح انٹرنیشنل ایئرپورٹ پر ایک افتتاحی تقریب بھی منعقد ہوئی جس میں گورنر سندھ نہال ہاشمی، وزارت مذہبی امور کے اعلیٰ حکام اور دیگر متعلقہ افسران نے شرکت کی۔
روانگی کے موقع پر معزز مہمانوں نے عازمینِ حج کے لیے نیک خواہشات کا اظہار کیا اور انہیں مبارکباد پیش کی، جبکہ ایئرپورٹ منیجر، ڈپٹی ایئرپورٹ منیجر اور ایئرپورٹ سیکیورٹی فورس کے افسران بھی اس موقع پر موجود تھے۔
حکام کے مطابق رواں سال کراچی ایئرپورٹ سے 31 ہزار سے زائد عازمین حج کے لیے سعودی عرب روانہ ہوں گے، جن کے لیے خصوصی انتظامات کیے گئے ہیں تاکہ ان کے سفر کو ہر ممکن حد تک سہل اور آرام دہ بنایا جا سکے۔
حج آپریشن کے تحت ’روڈ ٹو مکہ‘ پراجیکٹ بھی فعال ہے، جس کے ذریعے سعودی حکام کراچی ایئرپورٹ پر ہی عازمین کی امیگریشن مکمل کر رہے ہیں۔ اس سہولت کے باعث عازمین کو سعودی عرب پہنچنے کے بعد امیگریشن کے مراحل سے نہیں گزرنا پڑے گا، جس سے ان کے وقت اور سہولت میں نمایاں بہتری آئے گی۔
افتتاحی تقریب کے دوران مہمانوں نے روڈ ٹو مکہ سہولت کے تحت قائم سعودی امیگریشن کاؤنٹرز کا بھی معائنہ کیا اور ان انتظامات کو سراہتے ہوئے پاکستان ایئرپورٹس اتھارٹی کی کاوشوں کو قابلِ تحسین قرار دیا۔
حکام کا کہنا ہے کہ حج آپریشن کے دوران عازمین کو بہتر سہولیات فراہم کرنے کے لیے تمام متعلقہ ادارے مکمل طور پر متحرک ہیں تاکہ پاکستانی حجاج کرام اپنے مقدس سفر کا آغاز آسانی اور اطمینان کے ساتھ کر سکیں۔
