پاکستان میں ایران اور امریکا کے درمیان مجوزہ مذاکرات کے دوسرے دور کے سلسلے میں اہم پیش رفت سامنے آئی ہے، جہاں امریکی ایڈوانس سیکیورٹی ٹیم کے 6 خصوصی طیارے پاکستان پہنچ گئے ہیں۔
ذرائع کے مطابق یہ طیارے نور خان ایئربیس پر لینڈ کرگئے ہیں۔
امریکہ کی ایک ٹیم نور خان ائیر بیس پہنچ گئی.
— Hussain Ahmed Ch (@HussainAhmedCh8) April 19, 2026
ذرائع کا کہنا ہے کہ خصوصی طیاروں کے ذریعے آنے والی امریکی ایڈوانس سیکیورٹی ٹیم اپنے ہمراہ لاجسٹک سامان اور متعدد گاڑیاں بھی لائی ہے، جو آئندہ مذاکراتی عمل کے دوران استعمال میں لائی جائیں گی۔
مزید بتایا گیا ہے کہ اس ٹیم کے ساتھ خصوصی بلٹ پروف گاڑیاں اور ایمبولینس بھی پاکستان پہنچائی گئی ہیں تاکہ سیکیورٹی انتظامات کو مزید مؤثر بنایا جا سکے۔
ذرائع کے مطابق پاکستان میں متوقع امریکی مذاکراتی وفد انہی خصوصی گاڑیوں کے ذریعے اپنی آمد و رفت کرے گا، جبکہ ایمبولینس بھی وفد کی نقل و حرکت کے دوران ہمراہ رہے گی تاکہ کسی بھی ہنگامی صورتحال سے نمٹا جا سکے۔
واضح رہے کہ امریکا اور پاکستان کے درمیان مذاکرات کا دوسرا دور آئندہ ہفتے ہونے کا امکان ہے، اور امریکی صدر ڈونلڈ ٹرمپ نے اعلان کیا ہے کہ ان کی ٹیم اسلام آباد جارہی ہے جو کل شام وہاں پہنچ جائےگی۔
