اسلام آباد میں غیرملکی وفود کی آمد کے پیش نظر 21 اپریل بروز منگل کو بھی ریڈ زون میں واقع سرکاری دفاتر کے لیے ورک فرام ہوم کا اعلان کر دیا گیا۔
کابینہ ڈویژن کی جانب سے جاری کردہ نوٹیفکیشن کے مطابق ریڈ زون میں موجود تمام وزارتوں، ڈویژنز اور دیگر وفاقی اداروں میں 21 اپریل کو دفاتر کی بجائے گھر سے کام کیا جائے گا۔
نوٹیفکیشن میں تمام افسران اور عملے کو ہدایت کی گئی ہے کہ وہ اپنے اسٹیشن پر موجود رہیں اور ضرورت پڑنے پر فوری طور پر دفتر طلب کیے جانے کے لیے تیار رہیں۔
اس میں مزید کہا گیا ہے کہ سرکاری امور کی انجام دہی کے لیے خصوصی انتظامات مکمل کر لیے گئے ہیں۔
ضلعی انتظامیہ کے مطابق 21 اپریل کو ریڈ زون کے اندر آنے والے تمام تعلیمی ادارے بھی بند رہیں گے، جبکہ اسکولوں اور دفاتر کو ورک فرام ہوم کے انتظامات یقینی بنانے کی ہدایت دی گئی ہے۔
واضح رہے کہ امریکا اور ایران کے درمیان اسلام آباد میں مذاکرات ہونے جا رہے ہیں، جس کے پیش نظر سیکیورٹی کے سخت انتظامات کیے گئے ہیں۔
