معروف اداکار اور کامیڈین علی اصغر جو ’کامیڈی نائٹس ود کپِل‘ اور ’دی کپِل شرما شو‘ میں اپنے مقبول کردار ’دادی‘ کے لیے جانے جاتے ہیں نے انکشاف کیا ہے کہ انہوں نے خواتین کے کردار ادا کرنا اس وقت چھوڑ دیا جب ان کے بچوں کو اسکول میں بُلنگ کا سامنا کرنا پڑا۔
علی اصغر نے بتایا کہ اگرچہ یہ کردار ان کی پہچان اور کامیابی کا بڑا ذریعہ بنا تاہم اس کے غیر متوقع اثرات ان کی نجی زندگی پر پڑے۔ ان کے مطابق ان کے بچوں کو ہم جماعتوں کی جانب سے ان کے اسکرین کرداروں کی وجہ سے تضحیک اور مذاق کا سامنا کرنا پڑا جس نے انہیں شدید ذہنی اذیت دی۔
یہ بھی پڑھیں: کپل شرما شو کے سیٹ پر فنکاروں کے درمیان لڑائی، اصل معاملہ کیا ہے؟
اداکار نے بتایا کہ ان کے بچوں کو ’میرا باپ عورت ہے‘ جیسے جملوں کے ذریعے چھیڑا جاتا تھا جس سے وہ بہت متاثر ہوئے۔ علی اصغر کے مطابق یہ صورتحال ان کے لیے نظر انداز کرنا مشکل ہوتی گئی اور بالآخر انہوں نے اپنے کیریئر کے اس حصے پر نظر ثانی کی۔
انہوں نے کہا کہ ابتدا میں وہ یہ کردار مجبوری کے تحت کرتے رہے کیونکہ یہ ان کا ذریعہ معاش تھا تاہم وقت کے ساتھ احساس ہوا کہ وہ بار بار ایک ہی طرح کے کرداروں تک محدود ہو رہے ہیں۔ علی اصغر کے مطابق انہیں مسلسل خواتین کے کرداروں کی پیشکش کی جا رہی تھی جس سے ان کی پہچان ایک محدود دائرے میں قید ہو گئی تھی۔
یہ بھی پڑھیں: ‘نہ سر پر بال تھے نہ جیب میں پیسے’، نووجوت سنگھ نے کپل شرما کے پرانے دنوں کو کیسے یاد کیا؟
اداکار نے یہ بھی اعتراف کیا کہ کام کھونے کا خوف بھی ان کے فیصلوں پر اثر انداز ہوتا رہا لیکن اصل فیصلہ کن موڑ ان کے بچوں کو پیش آنے والی مشکلات تھیں۔ اس کے بعد انہوں نے ایسے کرداروں سے کنارہ کشی اختیار کرنے کا فیصلہ کیا تاکہ اپنی پیشہ ورانہ اور ذاتی زندگی میں بہتر توازن قائم کر سکیں۔
