پاکستان اسٹاک ایکسچینج میں منگل کے روز کاروبار کے دوران نمایاں تیزی دیکھنے میں آئی، جہاں بینچ مارک 100 انڈیکس 2 ہزار پوائنٹس سے زائد بڑھ گیا اور گزشتہ روز کی مندی کا ازالہ کر دیا۔
مزید پڑھیں: پاکستان اسٹاک ایکسچینج میں شدید مندی، 100 انڈیکس ابتدائی ٹریڈنگ میں 3,300 پوائنٹس گر گیا
کاروبار کے دوران انڈیکس 2,161 پوائنٹس یا 1.26 فیصد اضافے کے ساتھ 174,357 پوائنٹس کی سطح پر پہنچ گیا، جبکہ اس سے قبل یہ 172,196 پوائنٹس پر بند ہوا تھا۔ ابتدائی سیشن میں انڈیکس نے 3,100 پوائنٹس تک بھی اضافہ کیا، تاہم بعد ازاں معمولی کمی کے باوجود مارکیٹ مثبت زون میں رہی۔
مارکیٹ میں یہ تیزی اسٹیٹ بینک آف کی جانب سے سعودی عرب سے 3 ارب ڈالر ڈپازٹ کے دوسرے حصے کے طور پر 1 ارب ڈالر موصول ہونے کی تصدیق کے بعد دیکھنے میں آئی۔
یاد رہے کہ پیر کے روز مشرقِ وسطیٰ کی صورتحال کے باعث معاشی خدشات بڑھنے پر مارکیٹ میں 1,700 پوائنٹس سے زائد کی کمی ہوئی تھی۔
مزید پڑھیں: پاکستان اسٹاک ایکسچینج میں زبردست تیزی، 100 انڈیکس میں ہزار پوائنٹس کے قریب اضافہ
ماہرین کے مطابق آئندہ دنوں میں اسلام آباد میں ممکنہ امریکا ایران مذاکرات بھی مارکیٹ کی سمت کے تعین میں اہم کردار ادا کریں گے، تاہم سرمایہ کاروں کا رجحان خبروں کے زیر اثر حساس رہنے کا امکان ہے۔
