برطانوی شاہی خاندان نے بکنگھم پیلس میں ایک اہم تاریخی موقع پر خصوصی تقریب کا انعقاد کیا جس میں بادشاہ چارلس، ملکہ کمیلا، شہزادہ ولیم، شہزادی کیٹ سمیت دیگر سینئر اراکین نے شرکت کی۔ یہ تقریب ملکہ الزبتھ دوم کی 100ویں سالگرہ کی یاد میں منعقد کی گئی۔
تقریب کو شاہی خاندان میں اتحاد اور یکجہتی کے اظہار کے طور پر دیکھا جا رہا ہے، خاص طور پر ایسے وقت میں جب خاندان مختلف چیلنجز کا سامنا کر رہا ہے۔
یہ بھی پڑھیے: برطانوی شاہی خاندان کی سابق رکن سارہ فرگوسن آسٹریلیا جانے کی خواہشمند لیکن سانپوں کا خوف آڑے
شاہی محل کی جانب سے جاری تفصیلات کے مطابق اس استقبالیہ میں مرحومہ ملکہ کے سابقہ فلاحی اداروں کے نمائندوں اور ان افراد کو بھی مدعو کیا گیا جو اس سال اپنی 100ویں سالگرہ منا رہے ہیں۔
اسی دوران حیران کن طور پر یہ خبر بھی سامنے آئی ہے کہ شہزادہ ہیری نے بھی اپنی دادی کو یاد کرتے ہوئے اس موقع میں خاموشی سے شرکت کی، تاہم وہ خود امریکا میں مونٹیسیٹو میں موجود رہے۔
رپورٹس کے مطابق شہزادہ ہیری نے ونڈسر کیسل کے سینٹ جارج چیپل میں پھول بھی بھیجے، جہاں ملکہ الزبتھ دوم کو سپرد خاک کیا گیا تھا۔ ملکہ کو ستمبر 2022 میں ان کے شوہر شہزادہ فلپ اور دیگر اہل خانہ کے ساتھ دفن کیا گیا تھا۔
یہ بھی پڑھیے: شاہی خاندان کا غیر متوقع اعلان، بالمورل کیسل عوام کے لیے بند
رپورٹس کے مطابق بادشاہ چارلس اور شہزادہ ہیری کے درمیان ممکنہ صلح سے متعلق بات چیت جاری ہے، تاہم فی الحال صورتحال واضح نہیں ہے اور خاندان کے اندر اس حوالے سے خاموش مشاورت چل رہی ہے۔
محل کی جانب سے جاری تصاویر اور جھلکیوں میں تقریب کو ایک جذباتی اور تاریخی لمحے کے طور پر پیش کیا گیا ہے، جس میں شاہی خاندان کے اہم افراد نے بھرپور شرکت کی۔
