امریکا کے صدر ڈونلڈ ٹرمپ نے عندیہ دیا ہے کہ امریکا اور ایران کے درمیان مذاکرات کے دوسرے دور سے متعلق اچھی خبر جمعہ تک سامنے آسکتی ہے، جبکہ پاکستان کی جانب سے سفارتی کوششیں تیز کردی گئی ہیں۔
نیویارک پوسٹ کے مطابق آئندہ 36 سے 72 گھنٹوں میں مزید امن مذاکرات کا امکان پیدا ہوگیا ہے، صدر ٹرمپ نے اس ممکنہ پیشرفت پر ردعمل دیتے ہوئے کہا کہ یہ ممکن ہے۔
یہ بھی پڑھیں: اسلام آباد مذاکرات: خیبر پختونخوا اسمبلی کی خواتین ارکان کیا کہتی ہیں؟
یہ پیش رفت ایک روز بعد سامنے آئی ہے جب امریکی صدر نے اعلان کیا تھا کہ ایران کی قیادت کی جانب سے متفقہ تجویز آنے تک جنگ بندی میں توسیع کی جائے گی۔ ان کا کہنا تھا کہ امریکی فوج کو ناکہ بندی جاری رکھنے اور مکمل تیاری کی حالت میں رہنے کی ہدایت دی گئی ہے۔
دوسری جانب اسلام آباد میں سفارتی سرگرمیاں جاری ہیں اور پاکستانی ذرائع کے مطابق جنگ بندی سخت بیانات کے باوجود برقرار ہے، جو دونوں جانب مثبت ارادے کی نشاندہی کرتی ہے۔ ذرائع کا کہنا ہے کہ اب تک کسی قسم کی عسکری کشیدگی میں اضافہ نہیں ہوا۔
پاکستانی حکام نے ایک بار پھر واضح کیا ہے کہ پاکستان اس معاملے میں کلیدی ثالث کا کردار ادا کر رہا ہے اور فریقین کو مذاکرات کی میز پر لانے کے لیے کوششیں جاری ہیں۔
یہ بھی پڑھیں: وزیراعظم پاکستان اور فیلڈ مارشل کی درخواست پر ایران کے خلاف کارروائی روک دی، ڈونلڈ ٹرمپ
یاد رہے کہ گزشتہ رات طویل انتظار کے بعد امریکی اور ایرانی وفود مذاکرات کے لیے اسلام آباد تو نہ آئے لیکن رات گئے ایک خبر جاری کی گئی جس کے مطابق امریکی صدر ڈونلڈ ٹرمپ نے پاکستان کی درخواست پر جنگ بندی کی مدت میں غیر معیّنہ توسیع کا اعلان کیا۔
اقوام متحدہ میں ایرانی مندوب امیر سعید ایراوانی نے آج اپنے ایک بیان میں کہا ہے کہ اگر امریکا آبنائے ہرمز کی ناکہ بندی اُٹھا لے تو اسلام آباد میں مذاکرات کے لیے تیار ہیں۔ یہ بیان اس حقیقت کا عکاس ہے کہ ایران کی جانب سے مذاکرات میں شمولیت کی واحد رکاوٹ آبنائے ہرمز کی بحری ناکہ بندی ہے۔ اور ایران اس کے خاتمے کے بعد اِسلام آباد میں مذاکرات کے لیے آسکتا ہے۔
لیکن امریکی صدر کی جانب سے ایران کو ڈیل قبول نہ کرنے کے عوض سنگین نتائج کی دھمکیاں دی جا رہی ہیں جو امریکی صدر کی جانب سے دباؤ کی سفارت کاری نظر آتی ہے لیکن ایرانی قیادت کے لیے ایسی دھمکیاں قبول کرنا اندرونِ ملک اپنی سیاسی پوزیشن خراب کرنے کے مترادف ہے۔
یہ بھی پڑھیں: ڈونلڈ ٹرمپ نے ایران میں سزائے موت کا سامنا کرنے والی 8 خواتین کی رہائی کا مطالبہ کردیا
ماہرین کے مطابق مذاکرات کے دوبارہ شروع ہونے کا دارومدار امریکا کی جانب سے اعتماد سازی کے اقدامات پر ہے مثال کے طور پر اگر وہ بحری ناکہ بندی ختم کر کے ایرانی جہازوں کو چھوڑ دیتا ہے تو یہ مذاکرات کی جانب پیش قدمی ہوسکتی ہے۔
