پاکستانی فلم انڈسٹری کی آنے والی ایکشن فلم ’خان تمہارا‘ کی ریلیز کو خطے کی موجودہ صورتحال کے باعث مؤخر کر دیا گیا ہے۔
فلم کی پروڈکشن کمپنی ہم فلمز نے انسٹاگرام پر جاری ایک بیان میں کہا ہے کہ فلم کی ریلیز جو عیدالاضحیٰ کے موقع پر طے تھی اب ملتوی کر دی گئی ہے۔ کمپنی کے مطابق نئی ریلیز کی تاریخ کا اعلان جلد کیا جائے گا۔
View this post on Instagram
بیان میں مداحوں کا شکریہ ادا کرتے ہوئے کہا گیا کہ وہ ان کے صبر اور مسلسل حمایت کو قدر کی نگاہ سے دیکھتے ہیں اور فلم کو جلد از جلد سینما گھروں کی زینت بنانے کے لیے پرعزم ہیں۔
فلم ’خان تمہارا‘ میں مرکزی کردار بلال اشرف اور مایا علی ادا کر رہے ہیں۔ یہ ایک ایکشن اور ڈرامہ پر مبنی فلم ہے جس میں جدوجہد، ظلم کے خلاف مزاحمت اور بہادری کے موضوعات کو اجاگر کیا گیا ہے۔ فلم کے جاری کردہ ٹیزر میں برفیلے مناظر، سنسنی خیز ایکشن اور جدید جنگی انداز کے مناظر شامل ہیں۔
یہ بھی پڑھیں: جہاز چرا کر اڑانے اور خودکشی کرنے والے ایئرپورٹ ملازم کی آخری پرواز پر نئی دستاویزی فلم ریلیز
ذرائع کے مطابق فلم کی پروڈکشن میں بین الاقوامی ماہرین نے بھی حصہ لیا، جن میں ایکشن سیکوینسز کے لیے ہالی ووڈ سے وابستہ تکنیکی ٹیم شامل تھی۔ رپورٹ کے مطابق فلم کی شوٹنگ میں تقریباً 70 دن صرف ایکشن مناظر کی عکس بندی پر صرف ہوئے جبکہ مرکزی اداکار بلال اشرف نے اپنے اسٹنٹس خود انجام دیے اور دورانِ شوٹنگ زخمی بھی ہوئے۔
یہ فیصلہ ایسے وقت میں سامنے آیا ہے جب خطے میں جاری کشیدہ صورتحال کے باعث پاکستان میں متعدد تفریحی اور ثقافتی سرگرمیاں متاثر ہو رہی ہیں۔ اس سے قبل بھی مختلف ایوارڈ شوز اور شوبز تقریبات کو سیکیورٹی اور دیگر وجوہات کی بنا پر ملتوی کیا جا چکا ہے۔
ہم فلمز نے یقین دہانی کرائی ہے کہ فلم کی نئی ریلیز تاریخ کا اعلان حالات کے مطابق جلد کیا جائے گا۔
