الیکشن کمیشن آف پاکستان نے پنجاب میں بلدیاتی انتخابات کی تیاریوں کے سلسلے میں یونین کونسلز کی نئی حلقہ بندیوں کا عمل شروع کر دیا
الیکشن کمیشن آف پاکستان نے صوبہ پنجاب میں بلدیاتی انتخابات کے انعقاد کے لیے یونین کونسلز کی حلقہ بندیوں کا عمل باضابطہ طور پر شروع کر دیا ہے اور اس ضمن میں مکمل ٹائم لائن بھی جاری کر دی گئی ہے۔
الیکشن کمیشن کے مطابق حلقہ بندیوں سے متعلق تمام انتظامی اقدامات، کمیٹیوں کی تشکیل اور متعلقہ اتھارٹیز کی تعیناتی 16 اپریل 2026 تک مکمل کر لی گئی ہے، جبکہ اس عمل کو شفاف اور مؤثر بنانے کے لیے متعلقہ افسران کی خصوصی تربیت کا بھی اہتمام کیا گیا۔
یہ بھی پڑھ لیجیے پنجاب میں بلدیاتی انتخابات کی راہ ہموار، الیکشن کمیشن نے حلقہ بندیوں کا شیڈول جاری کردیا
جاری شیڈول کے مطابق ابتدائی حلقہ بندیوں کی تیاری کا عمل 20 اپریل سے شروع ہو چکا ہے جو 21 مئی 2026 تک جاری رہے گا۔ اس کے بعد ابتدائی فہرست 25 مئی 2026 کو شائع کی جائے گی۔
الیکشن کمیشن نے عوام کو حلقہ بندیوں پر اعتراضات جمع کروانے کے لیے 26 مئی سے 23 جون 2026 تک کا وقت دیا ہے، جبکہ ان اعتراضات پر فیصلے 22 جولائی 2026 تک مکمل کیے جائیں گے۔ فیصلوں کی ترسیل کا مرحلہ 4 اگست 2026 تک جاری رہے گا۔
حتمی حلقہ بندی فہرست 10 اگست 2026 کو جاری کی جائے گی، جس کے بعد بلدیاتی انتخابات کے انعقاد کی راہ مزید ہموار ہو جائے گی۔
یہ بھی پڑھ لیجیے پنجاب میں بلدیاتی انتخابات جماعتی یا پارٹی لیس بنیاد پر، پنجاب حکومت نے واضح کردیا
الیکشن کمیشن نے واضح کیا ہے کہ حلقہ بندیوں کے عمل کے دوران پنجاب بھر میں انتظامی یونٹس کی حدود میں کسی بھی قسم کی تبدیلی پر فوری پابندی عائد کر دی گئی ہے۔ اس سلسلے میں تمام اضلاع، تحصیلوں اور مقامی حکومتوں کی موجودہ حدود تاحکم ثانی برقرار رہیں گی۔
ادارے نے متعلقہ حکام کو ہدایت کی ہے کہ مقررہ ٹائم لائنز پر سختی سے عمل کیا جائے اور پورے عمل میں شفافیت، غیر جانبداری اور قانون کی مکمل پاسداری کو یقینی بنایا جائے۔
