اسلام آباد میں تھانہ شالیمار پولیس نے بڑی کارروائی کرتے ہوئے ایک ایسے ملزم کو گرفتار کر لیا ہے جو گاڑیوں میں سوار شہریوں اور فیملیز کو اسلحہ کے زور پر ہراساں اور لوٹ مار کا نشانہ بناتا تھا۔
یہ بھی پڑھیں: اسلام آباد پولیس کی کارروائیاں، جرائم پیشہ عناصر اور غیر قانونی مقیم افراد کے گرد گھیرا تنگ
پولیس کے مطابق ملزم مختلف شاہراہوں اور ویران مقامات پر کھڑی یا چلتی گاڑیوں میں موجود فیملیز کو خوفزدہ کرتا اور اسلحہ دکھا کر نقدی چھین لیتا تھا۔
کارروائی کے دوران پولیس نے انسانی اور تکنیکی ذرائع بروئے کار لا کر ملزم شکیل احمد کو گرفتار کیا۔
گرفتار ملزم سابقہ ریکارڈ یافتہ ہے اور شہریوں خصوصاً فیملیز کو ہراساں کرنے اور لوٹ مار کی وارداتوں میں ملوث رہا ہے۔ پولیس نے ملزم کے قبضے سے واردات میں استعمال ہونے والی گاڑی اور اسلحہ معہ ایمونیشن بھی برآمد کر لیا ہے۔
مزید پڑھیے: آئی جی اسلام آباد کے احکامات پر پولیس کا بڑے پیمانے پر فلیگ مارچ
ایس ایس پی آپریشنز قاضی علی رضا کا کہنا ہے کہ شہریوں کے جان و مال کے تحفظ کے لیے جرائم پیشہ عناصر کے خلاف مؤثر کارروائیاں جاری رہیں گی اور کسی کو بھی قانون ہاتھ میں لینے کی اجازت نہیں دی جائے گی۔
