وفاقی حکومت نے پیٹرولیم مصنوعات کی قیمتوں میں ایک بار پھر بھاری اضافے کا اعلان کردیا ہے۔ وزارتِ توانائی کی جانب سے جاری کردہ نوٹیفکیشن کے مطابق نئی قیمتوں کا اطلاق 25 اپریل 2026 سے ہوگا۔
یہ بھی پڑھیں: امریکا ایران جنگ سے مختلف ممالک میں پیٹرول کی قیمتوں پر کیا اثر پڑا؟
نوٹیفکیشن کے مطابق پیٹرول کی قیمت میں 26.77 روپے فی لیٹر اضافہ کیا گیا ہے، جس کے بعد پٹرول کی نئی قیمت 393.35 روپے مقرر کر دی گئی ہے۔
اسی طرح ہائی اسپیڈ ڈیزیل کی قیمت میں بھی 26.77 روپے فی لیٹر اضافہ کیا گیا ہے، جس کے بعد ڈیزیل کی نئی قیمت 380.19 روپے ہوگئی ہے۔
علاقائی کشیدگی کے باعث عالمی منڈی میں تیل مہنگا، قیمتیں بڑھانا مجبوری ہے، وزیرِ پیٹرولیم
وفاقی وزیرِ پیٹرولیم نے ملک میں پیٹرولیم مصنوعات کی قیمتوں میں حالیہ اضافے کا دفاع کرتے ہوئے کہا ہے کہ علاقائی کشیدگی کی وجہ سے عالمی منڈی میں خام تیل کی قیمتیں بڑھنے کے باعث حکومت کو یہ بوجھ عوام تک منتقل کرنے کے لیے سخت اقدامات اٹھانے پڑ رہے ہیں۔
یہ بھی پڑھیں: پاکستان کا پیٹرولیم ضروریات میں بڑا انحصار درآمدات پر، مقامی پیداوار محدود
وزیرِ پیٹرولیم کا کہنا تھا کہ حکومت نے جس قدر ممکن ہوا عالمی سطح پر ہونے والے اضافے کو خود برداشت کیا اور وفاقی و صوبائی حکومتوں نے عوام کو تاریخی ریلیف پیکیج بھی فراہم کیا۔ تاہم، موجودہ صورتحال کے پیشِ نظر آئندہ ہفتے کے لیے پیٹرول اور ڈیزیل کی قیمتوں میں فی لیٹر 26.77 روپے کا اضافہ ناگزیر ہوچکا ہے۔
انہوں نے مزید کہا کہ وہ دعاگو ہیں کہ خطے میں جلد امن قائم ہو تاکہ عالمی سطح پر قیمتیں مستحکم ہوں اور پاکستانی عوام کو پیٹرولیم مصنوعات کی قیمتوں میں حقیقی ریلیف فراہم کیا جاسکے۔
