پاکستان سپر لیگ 11 کے فائنل میچ کے ٹکٹ 27 اپریل سے عوام کے لیے دستیاب ہوں گے۔ فائنل 3 مئی کو لاہور کے قذافی اسٹیڈیم میں کھیلا جائے گا۔
پاکستان کرکٹ بورڈ کے مطابق آن لائن ٹکٹوں کی فروخت کا آغاز 27 اپریل سے کیا جائے گا جبکہ 28 اپریل سے فزیکل ٹکٹس مقررہ کوریئر سینٹرز سے صبح 10 بجے حاصل کیے جا سکیں گے۔
یہ بھی پڑھیے: داسن شناکا پی ایس ایل سے معطل ہونے والے تیسرے غیرملکی کھلاڑی، پی سی بی نے معذرت قبول نہ کی
پی سی بی نے ٹکٹوں کی قیمتوں کی تفصیلات بھی جاری کر دی ہیں۔ جنرل انکلوژر کا ٹکٹ 1500 روپے، فرسٹ کلاس 2000 روپے، پریمئم 4000 روپے، وی آئی پی 6000 روپے اور وی آئی پی فرسٹ اینڈ 8000 روپے مقرر کیا گیا ہے۔ اسی طرح وی وی آئی پی نیو پویلین کے ٹکٹ کی قیمت 10 ہزار روپے جبکہ گیلری کے ٹکٹ 12 ہزار روپے میں دستیاب ہوں گے۔
بورڈ کے مطابق فائنل میچ کے دوران شائقین کو اسٹیڈیم میں داخلے کی اجازت ہوگی اور میچ سے قبل ایک خصوصی اختتامی تقریب بھی منعقد کی جائے گی۔
پی سی بی نے شائقین سے اپیل کی ہے کہ وہ میچ کے آغاز سے کم از کم ساڑھے 6 بجے تک اسٹیڈیم پہنچ جائیں تاکہ سیکیورٹی اور داخلے کے عمل میں کسی قسم کی تاخیر نہ ہو۔
