وزیراعظم آزاد کشمیر کے پولیٹیکل اسسٹنٹ عزادار کاظمی نے وزیراعلیٰ خیبر پختونخوا سہیل آفریدی کی جانب سے وزیراعظم فیصل ممتاز راٹھور کے خلاف دیے گئے بیان کی شدید مذمت کرتے ہوئے اسے کشمیری عوام کی توہین قرار دیا ہے۔
یہ بھی پڑھیں:وزیراعلیٰ خیبرپختونخوا سہیل آفریدی کی مظفرآباد آمد، اختلافات کے باعث پی ٹی آئی بڑا جلسہ کرنے میں ناکام
اپنے بیان میں عزادار کاظمی نے کہا کہ وزیراعظم آزاد کشمیر کو ’مسلط وزیراعظم‘ کہنا نہ صرف ایک غیر ذمہ دارانہ بیان ہے بلکہ یہ کشمیری عوام کے مینڈیٹ کی بھی توہین ہے۔ انہوں نے واضح کیا کہ راجہ فیصل ممتاز راٹھور ایک عوامی ووٹ سے منتخب آئینی وزیراعظم ہیں اور انہیں ’پرچی‘ جیسے الفاظ سے مخاطب کرنا جمہوری نظام کی نفی ہے۔
انہوں نے مزید کہا کہ آزاد کشمیر قانون ساز اسمبلی نے اکثریت سے فیصل ممتاز راٹھور کو وزیراعظم منتخب کیا اور گزشتہ 5 ماہ کے دوران حکومت نے سیاسی استحکام اور انتظامی بہتری کے لیے مؤثر اقدامات کیے ہیں۔
عزادار کاظمی کا کہنا تھا کہ وہ سیاست میں برداشت اور رواداری کے قائل ہیں اور مہمانوں کی عزت کرنا جانتے ہیں، جبکہ راستے روکنا ان کی روایت نہیں۔ انہوں نے صوبہ خیبر پختونخوا میں بیڈ گورننس عروج پر ہونے کا الزام عائد کرتے ہوئے کہا کہ سہیل آفریدی اپنی حکومت کی ناکامیوں پر پردہ ڈالنے کے لیے سیاسی ڈراما کر رہے ہیں۔
انہوں نے مطالبہ کیا کہ وزیراعلیٰ خیبر پختونخوا سہیل آفریدی اپنے غیر ذمہ دارانہ بیانات پر فوری وضاحت پیش کریں اور معذرت کریں۔
