پی ایس ایل الیون کے 40 ویں میچ میں اسلام آباد یونائیٹڈ نے مارک چیپمین کی طوفانی بیٹنگ کی بدولت ملتان سلطانز کو 4 وکٹوں سے شکست دے کر فتح اپنے نام کر لی ہے، اس فتح کے ساتھ ہی اسلام آباد یونائیٹڈ نے پلے آف میں جگہ بنالی جبکہ ملتان سلطانز یونٹ سے باہر ہوگئی ہے۔
کراچی کے نیشنل بینک اسٹیڈیم میں کھیلے گئے اس سنسنی خیز مقابلے میں ملتان سلطانز نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 192 رنز کا بھاری مجموعہ ترتیب دیا۔ شان مسعود 44 رنز کے ساتھ نمایاں رہے، جبکہ اوپنرز صاحبزادہ فرحان اور اسٹیون اسمتھ نے 30، 30 رنز بنا کر ٹیم کو مستحکم آغاز فراہم کیا۔
یہ بھی پڑھیں: پی ایس ایل 11 فائنل: وزیراعظم شہباز شریف نے تماشائیوں کو اسٹیڈیم آنے کی اجازت دیدی
اننگز کے آخری لمحات میں محمد وسیم نے صرف 9 گیندوں پر 26 رنز کی برق رفتار اننگز کھیل کر اسکور بورڈ پر رنز کے انبار لگا دیے۔ اسلام آباد یونائیٹڈ کی جانب سے عماد وسیم، شاداب خان اور فہیم اشرف سمیت تمام باؤلرز نے ایک ایک وکٹ حاصل کی۔
ہدف کے تعاقب میں اسلام آباد یونائیٹڈ کا آغاز اچھا نہ تھا اور صرف 10 کے مجموعی اسکور پر پہلی وکٹ گر گئی۔ تاہم، مڈل آرڈر میں مارک چیپمین نے میچ کا پانسہ پلٹ دیا۔ چیپمین نے محض 33 گیندوں پر 69 رنز کی ناقابلِ شکست اننگز کھیلی، جس میں 4 چھکے اور 5 چوکے شامل تھے۔
یہ بھی پڑھیں: پی ایس ایل 11: حیدرآباد کنگز مین کی راولپنڈیز کے خلاف بڑے مارجن سے جیت، لاہور قلندر پلے آف سے باہر
کپتان شاداب خان نے 36 اور محسن ریاض نے 25 رنز بنا کر جیت میں اہم کردار ادا کیا۔ یونائیٹڈ نے مطلوبہ ہدف 18.4 اوورز میں 6 وکٹوں کے نقصان پر پورا کر لیا۔ ملتان سلطانز کی جانب سے فیصل اکرم نے 2 کھلاڑیوں کو آؤٹ کیا۔ شاندار کارکردگی پر مارک چیپمین کو ‘پلیئر آف دی میچ’ قرار دیا گیا۔
