صوبائی وزیر اطلاعات پنجاب عظمیٰ بخاری نے کہا ہے کہ وزیر اعلیٰ پنجاب کے مختلف عوامی فلاحی پروگرام جاری ہیں، جن میں ‘اپنا کھیت اپنا روزگار پروگرام’ کا باقاعدہ آغاز کر دیا گیا ہے۔
پنجاب اسمبلی میں میڈیا سے گفتگو کرتے ہوئے عظمیٰ بخاری نے کہا کہ سرکاری اراضی ماضی میں ویران پڑی رہتی تھی، اب اس زمین کو آباد کرنے کا موقع بے روزگار افراد کو دیا جا رہا ہے تاکہ وہ اپنے روزگار کے ساتھ صوبے کی معیشت میں بھی کردار ادا کر سکیں۔
یہ بھی پڑھیے: مکہ مکرمہ میں پاکستانی عازمینِ حج کی آمد شروع، منظم استقبال اور بہتر انتظامات
انہوں نے بتایا کہ دیہاتوں میں زمین آباد کرنے کے خواہشمند افراد کو 10 سال کے لیے زمین لیز پر دی جائے گی، جبکہ اس منصوبے کے تحت 160 ارب روپے مالیت کی اراضی شامل ہے، جس سے 88 ہزار 780 خاندان مستفید ہوں گے۔
صوبائی وزیر اطلاعات نے کہا کہ جو لوگ پہلے دوسروں کی زمین پر محنت کرتے تھے، اب وہ اپنی زمین پر کام کریں گے۔ انہوں نے بتایا کہ تمام دستیاب اراضی کی تفصیلات ویب سائٹس پر فراہم کر دی گئی ہیں، جہاں کہیں بڑے اور کہیں چھوٹے پلاٹس موجود ہیں۔ عظمیٰ بخاری نے کہا کہ زمین آباد کرنے کے لیے فی ایکڑ 50 ہزار روپے مقرر کیے گئے ہیں اور یہ زمین صرف کاشتکاری کے لیے استعمال ہو سکے گی۔
انہوں نے واضح کیا کہ یہ بنجر یا ناکارہ زمینیں نہیں بلکہ قابلِ کاشت اراضی ہے جہاں پانی بھی دستیاب ہے۔ ان کے مطابق 13 ہزار 800 لاٹس فراہم کیے جا رہے ہیں جبکہ چولستان میں 16 ہزار 665 لاٹس الگ سے موجود ہیں۔
یہ بھی پڑھیے: وزیراعلیٰ پنجاب مریم نواز کی اہم شاہراہوں پر لین اور لائن ڈسپلن یقینی بنانے کی ہدایت
انہوں نے کہا کہ پنجاب نے گندم کے ہدف سے زیادہ گندم کاشت کی ہے، جبکہ 5 ہزار سپر سیڈر دیے جا چکے ہیں اور 8 ہزار ٹیوب ویلز کو سولرائز کیا جا چکا ہے۔
عظمیٰ بخاری نے بتایا کہ پورٹل کھلنے سے پہلے ہی 9 سے زائد درخواستیں موصول ہو چکی تھیں، جو اس پروگرام میں عوامی دلچسپی کا ثبوت ہے۔
انہوں نے مزید کہا کہ ایک طرف ستھرا پنجاب، اپنی چھت اپنا گھر اور دیگر منصوبے جاری ہیں، جبکہ نواز شریف آئی ٹی سٹی میں فلم سٹی بھی قائم کی جا رہی ہے۔
