دنیا کے مختلف حصوں میں غیر معمولی موسمی صورتحال نے اپریل کے آخر میں شدید برفباری کو جنم دیا ہے جس کے باعث ماسکو اور امریکی ریاستوں میں معمولات زندگی شدید متاثر ہوئے ہیں۔
یہ بھی پڑھیں: پاکستان موسمیاتی تبدیلیوں سے زیادہ متاثر کیوں؟
27 اپریل 2026 کو آنے والے اس غیر معمولی طوفان کے نتیجے میں امریکا میں کولوراڈو، وائیومنگ اور مونٹانا میں شدید برفباری اور تیز ہواؤں کی وارننگ جاری کی گئی ہے۔
امریکی محکمہ موسمیات (نیشنل ویدر سروس) کے مطابق آرکٹک ٹھنڈی ہوا اور بہار کے درجہ حرارت کے ٹکراؤ سے خطرناک حالات پیدا ہو رہے ہیں۔
ماہرین نے خبردار کیا ہے کہ پیر کو سفر انتہائی خطرناک ہو سکتا ہے خاص طور پر پہاڑی علاقوں میں جہاں 20 انچ تک برفباری اور 45 میل فی گھنٹہ کی رفتار سے ہوائیں چلنے کا امکان ہے۔
دوسری جانب روس میں بھی صورتحال غیر معمولی ہے، جہاں ماسکو ریکارڈ توڑ برفباری کی لپیٹ میں آ گیا ہے۔ ماہر موسمیات ییوگینی تشکوویٹس کے مطابق موسمی ریکارڈ کی تاریخ میں 27 اپریل کو اس قدر برفباری پہلے کبھی نہیں دیکھی گئی۔
شدید برف کے باعث درخت گرنے اور درجنوں دیہات کی بجلی منقطع ہونے کی اطلاعات ہیں جس سے مقامی آبادی کو شدید مشکلات کا سامنا ہے۔
امریکا کے متاثرہ علاقوں میں حکام نے شہریوں کو غیر ضروری سفر سے گریز کرنے کی ہدایت کی ہے کیونکہ حد نگاہ کم ہونے اور موسمی حالات کے تیزی سے بدلنے کا خدشہ ہے۔
مزید پڑھیں: موسمیاتی تبدیلی سے متاثر ممالک ذمہ دار ریاستوں سے ہرجانے کے حقدار ہیں، عالمی عدالت انصاف کا اہم فیصلہ
اگرچہ کیلنڈر کے مطابق بہار کا موسم جاری ہے تاہم ماہرین کے مطابق کئی علاقوں میں موسم سرما جیسی صورتحال برقرار ہے۔ شہریوں کو گھروں میں رہنے اور احتیاطی تدابیر اختیار کرنے کا مشورہ دیا گیا ہے۔
