پاکستان تحریک انصاف (پی ٹی آئی) کے بانی عمران خان اور ان کی اہلیہ بشریٰ بی بی کے درمیان اڈیالہ جیل میں ملاقات کروا دی گئی۔
میڈیا رپورٹس کے مطابق یہ ملاقات کانفرنس روم میں ہوئی جو قریباً 40 منٹ تک جاری رہی، اس دوران دونوں نے ایک دوسرے کی خیریت دریافت کی۔
قبل ازیں گزشتہ رات اسلام آباد کے سرکاری اسپتال پمز میں بانی پی ٹی آئی عمران خان کی آنکھ کے علاج کا عمل مکمل کر لیا گیا۔ جہاں ماہرینِ چشم نے معائنہ کے بعد انہیں طبی طور پر مستحکم قرار دیا۔
اسلام آباد کے پاکستان انسٹی ٹیوٹ آف میڈیکل سائنسز (پمز) کی انتظامیہ نے بتایا ہے کہ بانی پاکستان تحریک انصاف عمران خان کو آنکھوں کے فالو اپ علاج کے لیے 28 اپریل کو اسپتال لایا گیا، جہاں انہیں اینٹی وی ای جی ایف انٹرا ویٹریل انجیکشن کی چوتھی خوراک دی گئی۔
اعلامیے کے مطابق طبی طریقہ کار سے قبل مریض کی مکمل رضامندی حاصل کی گئی، جبکہ ماہرینِ چشم نے تفصیلی معائنہ کیا جس کے بعد مریض کو طبی طور پر مستحکم قرار دیا گیا۔
دوسری جانب چیئرمین پی ٹی آئی بیرسٹر گوہر نے کہا ہے کہ ہمیں وقت پر یہ اطلاع نہیں دی گئی کہ عمران خان کو اسپتال لایا جارہا ہے، عمران خان اور بشریٰ بی بی کا علاج ان کے اہل خانہ کی موجودگی میں ہونا چاہیے۔
