ٹیکنالوجی کمپنی مائیکروسافٹ نے مقبوضہ مغربی کنارے (ویسٹ بینک) سے متعلق اپنے ڈیجیٹل نقشوں میں تبدیلی کرتے ہوئے اسرائیلی اصطلاحات ختم کرکے فلسطینی جغرافیائی نام شامل کر دیے ہیں۔ یہ اقدام بین الاقوامی قانون کے مطابق کیا گیا ہے۔
ترک خبر رساں ادارے انادولو ایجنسی کے مطابق عرب سینٹر فار دی ایڈوانسمنٹ آف سوشل میڈیا نے ایک بیان میں بتایا کہ ان تبدیلیوں کا اطلاق لوکیشن بیسڈ سروسز، بشمول سرچ انجن ’بِنگ‘ پر بھی کیا گیا ہے۔
اس سے قبل ویسٹ بینک کے مقامات کو ’جوڈیا اینڈ سامریا، اسرائیل‘ کے نام سے ظاہر کیا جاتا تھا، جسے اب تبدیل کرکے ویسٹ بینک کر دیا گیا ہے۔
’جوڈیا اینڈ سامریا‘ اسرائیل کی جانب سے استعمال ہونے والی اصطلاح ہے، جبکہ بین الاقوامی قانون کے مطابق ویسٹ بینک، بشمول مشرقی یروشلم، ایک فلسطینی علاقہ ہے جو اسرائیل کے زیرِ قبضہ ہے۔ یہ علاقہ مستقبل کی فلسطینی ریاست کا اہم حصہ تصور کیا جاتا ہے۔
مزید پڑھیں: آئرلینڈ میں مائیکروسافٹ کیخلاف تحقیقات کی درخواست کیوں دائر کی گئی؟
مبصرین نے ان تبدیلیوں کو ضروری اصلاح قرار دیتے ہوئے ٹیکنالوجی کمپنیوں پر زور دیا کہ وہ بین الاقوامی قوانین کی پاسداری کریں اور فلسطینی جغرافیے کو ڈیجیٹل طور پر نظرانداز کرنے سے گریز کریں۔
