پاکستان اور بنگلہ دیش کے درمیان تعلیمی تعاون پر اتفاق ہوا ہے۔
بنگلہ دیش میں متعین پاکستان کے ہائی کمشنر عمران حیدر نے بنگلہ دیش کے وزیر تعلیم اے این ایم احسان الحق سے ملاقات کی اور انہیں وزارت کا منصب سنبھالنے پر مبارکباد پیش کی۔ ملاقات کے دوران دونوں ممالک کے درمیان کثیر الجہتی دوطرفہ تعلقات پر تبادلہ خیال کیا گیا، جس میں خاص طور پر تعلیم اور جدید ٹیکنالوجی کے شعبوں میں تعاون کے مواقع پر توجہ مرکوز کی گئی۔
یہ بھی پڑھیں: بنگلہ دیشی وزیر داخلہ سے پاکستانی ہائی کمشنر کی ملاقات، تعلقات مضبوط کرنے کا عزم
پاکستانی ہائی کمشنر نے بنگلہ دیشی وزیر تعلیم کو ‘پاکستان بنگلہ دیش نالج کوریڈور’ کے اقدام اور ‘پاکستان ٹیکنیکل اسسٹنس پروگرام’ کے بارے میں تفصیلی بریفنگ دی۔ انہوں نے بتایا کہ ان پروگراموں کے تحت بنگلہ دیشی طلبہ کو پاکستان کے صفِ اول کے تعلیمی اداروں میں اعلیٰ تعلیم کے حصول کے لیے اسکالرشپ کے وسیع مواقع فراہم کیے جارہے ہیں۔
انہوں نے کہا کہ طب، فارمیسی، انجینئرنگ، بائیوٹیکنالوجی، بزنس ایڈمنسٹریشن، آرٹیفیشل انٹیلیجنس، کمپیوٹر سائنس، آرٹس اور فیشن ڈیزائننگ جیسے جدید اور خصوصی شعبوں میں تعلیم حاصل کی جاسکتی ہے۔
یہ بھی پڑھیں: ڈھاکہ میں’میڈ ان پاکستان‘ نمائش کے انعقاد میں بھرپور تعاون کریں گے، پاکستانی ہائی کمشنر
ملاقات کے اختتام پر دونوں رہنماؤں نے تعلیم، پیشہ ورانہ تربیت اور کھیلوں کے شعبوں میں وفود کے تبادلوں کے ذریعے باہمی تعلقات کو مزید مستحکم کرنے پر اتفاق کیا۔ اس موقع پر اس عزم کا اظہار کیا گیا کہ تعلیمی اشتراک سے دونوں ممالک کے نوجوانوں کے لیے ترقی کی نئی راہیں کھلیں گی۔
