بینکنگ جرائم کورٹ اسلام آباد میں بانی پی ٹی آئی اور دیگر کے خلاف فارن فنڈنگ کیس کی سماعت کے دوران اہم پیش رفت سامنے آئی، جہاں ضمانت قبل از گرفتاری کی درخواستوں پر فیصلہ محفوظ کر لیا گیا جبکہ عدالتی کارروائی کے دوران چیٹ جی پی ٹی کا تذکرہ بھی زیر بحث آیا۔
کیس کی سماعت جج عبدالغفور کاکڑ نے کی۔ سماعت کے موقع پر اسپیشل پراسیکیوٹر واثق ملک، وکیل صفائی شاہ خاور اور دیگر عدالت میں پیش ہوئے۔
یہ بھی پڑھیں:بنکنگ کورٹ اسلام آباد: پی ٹی آئی فارن فنڈنگ کیس میں چالان مکمل، چند روز میں پیش کیے جانے کا امکان
وکیل صفائی شاہ خاور نے ملزم سراج احمد کی جانب سے ضمانت قبل از گرفتاری پر دلائل دیتے ہوئے مؤقف اختیار کیا کہ ان کے مؤکل کا نام براہ راست ایف آئی آر میں شامل نہیں، جبکہ اس کیس میں تین دیگر ملزمان کی ضمانت قبل از گرفتاری پہلے ہی منظور ہو چکی ہے۔ اسی طرح ملزم فیصل قاضی کی درخواست ضمانت پر بھی دلائل دیے گئے۔
دوسری جانب پراسیکیوٹر واثق ملک نے عدالت کو بتایا کہ تقریباً 20 کروڑ روپے “نیا پاکستان” نامی اکاؤنٹ میں منتقل کیے گئے، اور مؤقف اختیار کیا کہ کسی سیاسی جماعت کے لیے مرچنڈائز اکاؤنٹ نہیں ہوتا۔ انہوں نے کہا کہ ملزم فیصل قاضی نے بینکنگ ٹرانزیکشن میں سہولت کاری کی اور ٹرانزیکشن کے دوران تحریک انصاف کو کمپنی ظاہر کیا گیا، جبکہ بینک کے مطابق حتمی منظوری کا اختیار بھی انہی کے پاس تھا۔
عدالت نے سراج احمد اور فیصل قاضی کی ضمانت قبل از گرفتاری کی درخواستوں پر فیصلہ محفوظ کر لیا۔
سماعت کے دوران بانی پی ٹی آئی کے وکیل فتح اللہ برقی نے چالان کی عدم فراہمی کا شکوہ کرتے ہوئے کہا کہ انہوں نے رجسٹرار کی جانب سے اسکروٹنی کے معاملے پر چیٹ جی پی ٹی سے بھی رہنمائی لینے کی کوشش کی۔ اس پر پراسیکیوٹر واثق ملک نے ردعمل دیتے ہوئے کہا کہ اگر چیٹ جی پی ٹی کی بات ہو رہی ہے تو وہ اس پر کیا جواب دیں۔
یہ بھی پڑھیں:فارن فنڈنگ کیس میں عدالت کے اہم ریمارکس، عمران خان نئی مشکل میں پھنس گئے
پراسیکیوٹر کے مطابق چالان جمع ہو چکا ہے اور رجسٹرار آفس میں اس کی اسکروٹنی جاری ہے، جبکہ وکیل کا مؤقف تھا کہ ابھی تک انہیں چالان فراہم نہیں کیا گیا۔ اس معاملے پر عدالت میں تلخ جملوں کا تبادلہ بھی ہوا اور پراسیکیوٹر کمرہ عدالت سے چلے گئے۔
بعد ازاں عدالت نے چالان کی اسکروٹنی جاری رہنے کے باعث کیس کی سماعت 11 مئی تک ملتوی کر دی۔
