بنگلہ دیش کی قومی فضائی کمپنی بیمان بنگلہ دیش ایئرلائنز نے اپنے بیڑے میں توسیع اور جدید بنانے کے لیے امریکی طیارہ ساز کمپنی بوئنگ سے 14 نئے طیاروں کی خریداری کا اعلان کیا ہے۔
مذکورہ اعلان کے مطابق یہ بنگلہ دیشی ایئرلائن کمپنی کی تاریخ کا سب سے بڑا معاہدہ ہے۔
اس آرڈر میں بڑی اور درمیانی جسامت والے دونوں اقسام کے طیارے شامل ہیں، جن کا مقصد طویل فاصلے اور علاقائی پروازوں کو مضبوط بنانا ہے۔
یہ بھی پڑھیں: بنگلہ دیش دنیا کا 33واں جوہری توانائی استعمال کرنے والا ملک بن گیا
معاہدے کے تحت ایئرلائن 8 جدید بوئنگ 787-10 ڈریم لائنرحاصل کرے گی، جو پہلی بار اس کے بیڑے میں شامل ہوں گے اور زیادہ تر مشرق وسطیٰ کے مصروف روٹس پر استعمال ہوں گے۔
اس کے علاوہ 2 بوئنگ 787-9 طیارے یورپ اور شمالی امریکا کے طویل روٹس کے لیے خریدے جائیں گے، جبکہ 4 بوئنگ 737-8 طیارے بھی شامل کیے جائیں گے.
جو 737 میکس سیریز میں بنگلہ دیشی ایئرلائن کی پہلی خریداری ہوں گے۔
মার্কিন উড়োজাহাজ নির্মাতা প্রতিষ্ঠান বোয়িংএর কাছ থেকে বিমানের আরও ১৪টি নতুন ও অত্যাধুনিক উড়োজাহাজ কেনার চুক্তি স্বাক্ষর সম্পন্ন pic.twitter.com/VylQTc6EA8
— Ekhon TV (@ekhon_tv) April 30, 2026
ایئرلائن کے منیجنگ ڈائریکٹر اور سی ای او کائزر سہیل احمد کے مطابق جدید اور کم ایندھن استعمال کرنے والے طیاروں کی شمولیت سے آپریشنل کارکردگی میں نمایاں بہتری آئے گی۔
’اس سے بین الاقوامی نیٹ ورک کو وسعت ملے گی، جس سے عالمی ہوا بازی کے شعبے میں بنگلہ دیش کی حیثیت مزید مضبوط ہوگی۔‘
مزید پڑھیں: بنگلہ دیش میں دہشتگردی کا خطرہ، ایئرپورٹس سمیت اہم مقامات پر سیکیورٹی سخت کردی گئی
اس وقت بیمن بنگلہ دیش کے بیڑے میں 14 بوئنگ طیارے شامل ہیں، جن میں 787-8، 787-9، 777 اور نیکسٹ جنریشن 737 شامل ہیں۔
نئے 787-10 طیاروں کی آمد سے مسافروں اور کارگو کی گنجائش بڑھے گی جبکہ فی نشست لاگت کم ہوگی، جس سے یہ دنیا کے مؤثر ترین طیاروں میں شامل ہو جائیں گے۔
نئے 737-8 طیارے علاقائی پروازوں، خصوصاً مشرق وسطیٰ، بھارت اور جنوب مشرقی ایشیا کے لیے رابطوں کو بہتر بنانے میں مدد دیں گے۔
مزید پڑھیں: امریکا میں 2 بنگلہ دیشی طلبا کے قتل پر بنگلہ دیش کا فوری اور شفاف تحقیقات کا مطالبہ
787 اور 737 میکس سیریز کے طیارے پرانے ماڈلز کے مقابلے میں 20 سے 25 فیصد تک زیادہ ایندھن کی بچت فراہم کرتے ہیں۔
فی الحال بیمان بنگلہ دیش ڈھاکہ سے 22 بین الاقوامی مقامات کے لیے پروازیں چلاتی ہے، جن میں مشرق وسطیٰ، جنوبی و جنوب مشرقی ایشیا اور یورپ کے اہم شہر شامل ہیں۔
اس کا طویل ترین روٹ ڈھاکہ سے ٹورنٹو تک استنبول کے ذریعے چلایا جاتا ہے۔
بوئنگ کے اندازوں کے مطابق آئندہ 2 دہائیوں میں جنوبی ایشیا میں بڑے طیاروں کا بیڑا 3 گنا سے زیادہ بڑھنے کی توقع ہے، جس میں بڑھتی ہوئی بین الاقوامی سفری طلب اہم کردار ادا کرے گی۔
