اسلام آباد ہائیکورٹ میں بانی پی ٹی آئی کے ایکس اکاؤنٹ بند کرنے کی درخواست پر سماعت ہوئی۔ عدالت نے چیئرمین پی ٹی آئی بیرسٹر گوہر کو نوٹس جاری کرتے ہوئے ان سے جواب طلب کر لیا۔
مزید پڑھیں: چیئرمین پی ٹی آئی بیرسٹر گوہر کی سپریم کورٹ میں چیف جسٹس سے ملاقات
اسی دوران بانی پی ٹی آئی سے وکیل سلمان اکرم راجا کی ملاقات نہ کرانے پر توہین عدالت کی درخواست پر بھی سماعت ہوئی، جس میں عدالت نے جیل حکام سے جواب طلب کیا۔
سماعت جسٹس ارباب محمد طاہر نے کی۔ بانی پی ٹی آئی کی جانب سے وکیل سلمان اکرم راجا عدالت میں پیش ہوئے۔ انہوں نے عدالت کو بتایا کہ اس کیس میں جیل حکام نے ابھی تک ان کا وکالت نامہ دستخط کروا کر نہیں دیا، تاہم وہ کیس کی پیروی جاری رکھنا چاہتے ہیں۔
عدالت نے کہا کہ اس معاملے پر تمام فریقین کے جوابات جمع ہو چکے ہیں۔ وکیل درخواست گزار نے مؤقف اپنایا کہ عدالت نے پہلے بھی جیل حکام سے بانی سے ملاقات نہ کرانے کی وضاحت طلب کی تھی۔
مزید پڑھیں: چیئرمین پی ٹی آئی نے جوڈیشل کمیشن اجلاس میں شرکت بانی سے ملاقات سے مشروط کر دی
عدالت نے ریمارکس دیے کہ پی ٹی آئی بھی اس معاملے میں فریق ہے۔ سلمان اکرم راجا نے کہا کہ بانی کا ذاتی ایکس اکاؤنٹ ہے۔ عدالت نے چیئرمین پی ٹی آئی کو نوٹس جاری کرتے ہوئے جواب طلب کر لیا اور کیس کی سماعت ایک ہفتے کے لیے ملتوی کر دی۔
