وزیراعلیٰ پنجاب مریم نواز شریف نے صوبے میں 27 نئے سہولت بازاروں کی تکمیل کے لیے جولائی کا ہدف مقرر کر دیا ہے۔ پنجاب کے مختلف اضلاع میں 13 سہولت آن دی گو بازار بھی قائم کیے جائیں گے۔
مزید پڑھیں: وزیر اعلیٰ پنجاب مریم نواز شریف کی کوئٹہ آمد، پرتپاک استقبال
ان 27 نئے سہولت بازاروں کے ذریعے 1300 نئے کاروبار شروع ہوں گے جبکہ 600 سے زائد افراد کے لیے براہ راست روزگار کے مواقع پیدا ہوں گے۔ نئے سہولت بازاروں سے سالانہ 9 کروڑ سے زائد شہری مستفید ہوں گے۔ ان بازاروں میں اشیائے خوردونوش اوپن مارکیٹ کے مقابلے میں 40 فیصد اور ڈی سی ریٹ سے 18 فیصد کم قیمت پر دستیاب ہوں گی۔
منصوبے کے تحت ساڑھے 8 لاکھ سے زائد گھرانوں کو مجموعی طور پر 5 ارب 30 کروڑ روپے کی بچت ہوگی۔ سہولت بازاروں کے قیام سے مقامی سپلائی چین اور کاروباری سرگرمیوں کو فروغ ملے گا جبکہ دکانداروں کی فروخت میں 24 فیصد اور منافع میں 23 فیصد اضافہ متوقع ہے۔
دکانداروں کو مفت بجلی، صفائی اور سیکیورٹی کی سہولیات سے سالانہ قریباً 35 کروڑ روپے کی بچت ہوگی۔ ہر سہولت بازار میں سی سی ٹی وی کیمروں کے ذریعے مرکزی کنٹرول روم سے نگرانی کی جائے گی۔
5 کلومیٹر کے اندر 40 منٹ میں فری ہوم ڈلیوری سروس بھی فراہم کی جائے گی جس سے وقت اور ایندھن کی بچت ہوگی۔ بھکر، میانوالی، پاکپتن، راجن پور، مظفر گڑھ، منڈی بہاؤالدین، راولپنڈی، اٹک اور جہلم کی تحصیلوں میں نئے بازار قائم ہوں گے۔
خانیوال، فیصل آباد، جھنگ، ٹوبہ ٹیک سنگھ، بہاولپور، بہاولنگر، اوکاڑہ، سیالکوٹ، گجرات اور سرگودھا بھی منصوبے میں شامل ہیں۔ لاہور، جہلم، بھکر، راولپنڈی، قصور اور فیصل آباد کی مختلف تحصیلوں میں سہولت آن دی گو بازار قائم کیے جائیں گے۔
مزید پڑھیں: پنجاب عالمی منڈی میں آلو ایکسپورٹ کرنے والا صوبہ بننے کے قریب، وزیر اعلیٰ مریم نواز شریف کا اعلان
مریم نواز شریف نے کہا کہ پنجاب کے عوام کو سستی اور معیاری اشیا کی فراہمی کا وعدہ ہر صورت پورا کیا جائے گا۔ انہوں نے کہا کہ ان بازاروں میں صاف ستھرے ماحول میں ارزاں نرخ پر پھل، سبزیاں اور دیگر اشیا دستیاب ہوں گی۔
انہوں نے مزید کہا کہ سہولت بازاروں میں پارکنگ، بیٹھنے کی جگہ، بزرگ شہریوں کے لیے علیحدہ کاؤنٹر، پینے کے صاف پانی اور فیملی فرینڈلی ماحول کی سہولت بھی فراہم کی جائے گی۔
