انٹرنیشنل کرکٹ کونسل (آئی سی سی) نے ٹی20 ٹیموں کی سالانہ رینکنگ جاری کردی ہے جس میں ابتدائی 7 ٹیموں کی پوزیشنز میں کوئی تبدیلی نہیں آئی۔
ورلڈ چیمپیئن بھارت بدستور سرفہرست ہے تاہم اس کے رینکنگ پوائنٹس میں ایک پوائنٹ کی کمی ہوئی ہے، جبکہ انگلینڈ دوسرے، آسٹریلیا تیسرے اور نیوزی لینڈ چوتھے نمبر پر برقرار ہیں۔
اس کے علاوہ جنوبی افریقا پانچویں، پاکستان چھٹے اور ویسٹ انڈیز ساتویں پوزیشن پر موجود ہیں۔
رینکنگ میں سری لنکا کو 6 پوائنٹس کی کمی کے باعث ایک درجہ تنزلی کا سامنا کرنا پڑا ہے اور وہ آٹھویں سے نویں نمبر پر چلا گیا ہے، جبکہ بنگلہ دیش ایک پوائنٹ اضافے کے ساتھ آٹھویں پوزیشن پر آگیا۔
آئی سی سی رینکنگ کے مطابق افغانستان دسویں، زمبابوے گیارہویں اور آئرلینڈ بارہویں نمبر پر موجود ہیں۔
ویمنز رینکنگ میں ٹاپ 10 ٹیموں کی پوزیشنز برقرار
دوسری جانب آئی سی سی ویمنز ٹی20 سالانہ رینکنگ میں ٹاپ 10 ٹیموں کی پوزیشنز جوں کی توں برقرار ہیں۔
آئی سی سی کے مطابق آسٹریلیا پہلے نمبر پر براجمان ہے جبکہ انگلینڈ دوسرے اور بھارت تیسرے نمبر پر ہے۔
اس کے علاوہ نیوزی لینڈ چوتھے اور جنوبی افریقہ پانچویں نمبر پر موجود ہیں، جبکہ ویسٹ انڈیز چھٹے، سری لنکا ساتویں اور پاکستان آٹھویں نمبر پر موجود ہے۔
